साउन ७, सोलुखुम्बु । दिप्रुङ चुइचुम्मा गाउँपालिकाले सामाजिक सुरक्षा भत्ता वितरणसँगै स्वास्थ्य सेवा उपलब्ध गराउने उद्देश्यले सञ्चालन गरेको एकीकृत घुम्ती शिविरअन्तर्गत बुधबार वडा नम्बर ५ र ६ मा सामाजिक सुरक्षा भत्ता वितरण तथा स्वास्थ्य परीक्षण कार्यक्रम सम्पन्न गरेको छ । गाउँपालिकाको सामाजिक सुरक्षा तथा पञ्जीकरण शाखा, हेल्लो डाक्टर कार्यक्रम र सानिमा बैंक दिप्रुङ शाखाको संयुक्त सहकार्यमा सञ्चालित शिविरमा बैंकिङ प्रणालीमार्फत लाभग्राहीको घर नजिकै पुगेर सामाजिक सुरक्षा भत्ता वितरण गरिएको हो ।
वडा नम्बर ५ (साविक छितापोखरी) मा ९० जना लाभग्राहीलाई कुल ९ लाख ७२ हजार ५०० रुपैयाँ सामाजिक सुरक्षा भत्ता वितरण गरिएको छ। सोही क्रममा ४२ जनाको स्वास्थ्य परीक्षण, स्वास्थ्य परामर्श तथा आवश्यक सामान्य औषधि वितरण गरिएको गाउँपालिकाले जनाएको छ। त्यसैगरी वडा नम्बर ६ (छितापोखरी) मा ९७ जना लाभग्राहीलाई ९ लाख ८२ हजार ५०० रुपैयाँ सामाजिक सुरक्षा भत्ता वितरण गरिएको छ भने ५५ जनाको स्वास्थ्य परीक्षण गरी आवश्यक स्वास्थ्य सेवा प्रदान गरिएको छ ।
दुवै वडामा गरी १ सय ८७ जना लाभग्राहीलाई १९ लाख ५५ हजार रुपैयाँ सामाजिक सुरक्षा भत्ता वितरण गरिएको छ भने ९७ जनाले स्वास्थ्य परीक्षण तथा परामर्श सेवा प्राप्त गरेको गाउँपालिकाका लेखा अधिकृत राजु पोखेलले बताउनुभयो । गाउँपालिकाले आर्थिक वर्ष २०८२÷०८३ को अन्तिम तथा चौथो त्रैमासिक सामाजिक सुरक्षा भत्ता वितरणलाई स्वास्थ्य सेवासँग जोड्दै प्रत्येक वडामै पुगेर सेवा प्रवाह गरिरहेको जनाएको छ।
यसबाट ज्येष्ठ नागरिक, अशक्त, एकल महिला तथा अन्य लाभग्राहीलाई सहज रूपमा बैंकिङ सेवा र आधारभूत स्वास्थ्य सेवा उपलब्ध गराउन मद्दत पुगेको गाउँपालिकाको विश्वास छ।
Discussion about this post