नुनथला छिर्दी सडकको हाइड्रोका कारण हरिबिजोग, स्थानीय जुटेर गरे श्रमदान 

सोलुखुम्बु, साउन १८। हिमाली जिल्ला सोलुखुम्बुको सल्लेरी देखी सुर्केसम्मको सडक खण्ड अन्तर्गत नुनथला छिर्दी क्षेत्रको सडक मर्मतका लागी सोलु दुधकुण्ड नगरपालिका १ टाक्सिन्दु फुलेलीका स्थानीय आँफै जुटेका छन् ।  राउजे र लुजाङ हाइड्रोको कार्यक्षेत्र भित्र पर्ने उक्त सडक खण्डका यिनै हाइड्रोका भिमकाय सवारी साधन गुड्दा सडक ध्वस्त भएपछि स्थानीय आँफै श्रमदान मार्फत मर्मतमा जुटेका हुन् ।

 फुलेली बासीले उक्त सडक खण्ड अन्तर्गतको करिव १३ किलोमिटर भित्रको खाल्डाखुल्डीपुर्ने, ढुँगा बिछ्याउने, ड्रेन काट्ने काम गरि सहज आवतजावतका लागी तयार गरेका हुन् ।  स्थानीयवासीको दैनिकीसँग प्रत्यक्ष जोडिएको सडक भएका कारण नियमित सास्ती भोग्दै आएका उनीहरूले पटक पटक हाइड्रो तथा स्थानीय सरकारसँग अनुनय गरेपनि सुनवाई नभएको गुनासो गरेका छन् ।

 साउन १६ र १७ गते २ दिन सञ्चालित उक्त अभियानले सडकका खाल्डाखुल्डी पुर्ने हिलाम्मे स्थानमा ढुँगा बिछ्‌याउने काम गरि आवतजावतलाई सहज बनाएको स्थानीय श्याम खालिङले बताउनुभयो । सडक मर्मतका लागी युवादेखि ज्येष्ठ नागरिकसम्म करिव २ सय जना श्रमदानमा सहभागी भएका थिए । लौरोको सहारामा हिँड्नुपर्ने अवस्थाका अशक्त वृद्धवृद्धाहरू समेत सडक मर्मतका लागी कुटो, गैँती बोकेर सडकमा निस्किएका थिए ।  

ठूला र हेव्वी सवारी साधन गुड्दा सडकमा एम्बुलेन्स समेत सञ्चालनमा समस्या आएपछि स्थानीयले ठूला सवारी साधन आवतजावतनै बन्द गरिदिएका छन् ।  सडक मर्मत पछि नियमित अनुगमनका लागी स्थानीयकै नेतृत्वमा १३ सदस्यीय अनुगमन समिति समेत बनेको छ ।