साउन १९, सोलुखुम्बु । हिमाली जिल्ला सोलुखुम्बुको माथिल्लो क्षेत्र जाने सल्लेरी सुर्के सडकखण्ड अन्तर्गतको नुनथला टक्सिन्दु सडक खण्डमा ठुला सवारीसाधन प्रवेशका लागी ५ हजार शुल्क तोकिएको विषय विवादीत बनेको छ । ठूला सवारी साधन कच्ची सडकमा गुड्दा सडकमा क्षति पुगेको भन्दै स्थानीयहरुले ५ हजार लिने गरेको भन्दै निर्माण व्यवसायीहरुबाट गुनासो आएको हो ।
सोलुदुधकुण्ड नगरपालिका वडा नम्बर १ क्षेत्रका स्थानीयले ’स्थानीय शुल्क’ भन्दै ट्याक्टर लगायत टिफर, आइचर जस्ता निर्माणमा प्रयोग हुने सवारी साधनलाई ५ हजार रुपैयाँ लिने गरेको निर्माण व्यवसायी विजय तामाङले बताउनुभयो । यस विषयमा सोलुदुधकुण्ड नगरपालिका वडा नम्बर १ का अध्यक्ष छोङ्वा शेर्पालाई सोध्दा उहाँले ठूला सवारी साधनले सडक ध्वस्त बनाएको र उक्त सडक मर्मतमा स्थानीयले श्रमदान गरेको हुँदा उक्त शुल्क लिएको बताउनुभयो ।
यसरी शुल्क लिन नपाइने भए तापनि श्रमदानमा त्यसले खाजा नास्ता र औजार खर्चमा योगदान गर्ने भएकाले स्थानीयहरुले व्यवहारिक हिसाबले लिएको हुन सक्ने उहाँको भनाई छ । यद्यपि उक्त कदमलाई जिल्ला प्रशासन कार्यालय सोलुखुम्बुले कानुनविपरीत भनेको छ । बाटो अवरोध गर्न नपाउने भन्दै सवारी साधनलाई विभिन्न बहानामा रकम लिन नपाइने प्रशासनले स्पष्ट पारेको छ ।
जिल्ला प्रशासन कार्यालय सोलुखुम्बुका प्रमुख जिल्ला अधिकारी कमान सिंह थापा मगरले केही थान गुनासोहरू प्राप्त भएकाले त्यस विषयमा प्रशासनले आफ्नो कदम चालिसकेको उहाँको भनाई थियो । साउन १६ र १७ गते टाक्सिन्दु फुलेलीका नागरिकहरूले करिव १३ किलोमिटर सडक श्रमदान मार्फत विभिन्न ठाउँमा मर्मत गरि सञ्चालन योग्य बनाएका थिए ।
Discussion about this post