सोलुखुम्बुका अधिकांश कार्यालयमा छन् सूचना अधिकारी

सोलुखुम्बु, ३ भदौ । आज राष्ट्रिय सूचना दिवस । राष्ट्रिय सूचना दिवसका अवसरमा गरिएको विवरण अध्ययन अनुसार सोलुखुम्बुका मुख्य जिल्लास्तरीय कार्यालयमध्ये अधिकांश कार्यालयहरूमा सूचना अधिकारी तोकिएको पाइएको छ भने केही कार्यालयहरूका सार्वजनिक विवरणमा सूचना अधिकारीबारे स्पष्ट नभएको समेत पाइएको छ ।

जिल्लास्थित कार्यालयहरूको माउ कार्यालय जिल्ला प्रशासन कार्यालयको वेबसाइटमा जिल्ला प्रशासन कार्यालयका देवेन्द्र सुवेदीसहित जिल्लास्थित अधिकांश कार्यालयका लागि सूचना अधिकारीको विवरण राखिएको छ ।

यद्यपि कतिपय अवस्थामा कर्मचारीको सरुवा र जिम्मेवारी हेरफेर भएको अवस्थामा विवरण अद्यावधिक नभएको समेत गुनासाहरू आउने गरेका छन् । मुख्य कार्यालयहरूमध्ये जिल्ला अदालतका सृजना उप्रेती, जिल्ला प्रहरी कार्यालयका विकास राई तथा मालपोत कार्यालयका राजीव तिमल्सिनालाई सूचना अधिकारीका रूपमा उल्लेख गरिएको छ ।

कोष तथा लेखा नियन्त्रक कार्यालय सोलुखुम्बुमा नवीन राईलाई सूचना अधिकारी तोकिएको कार्यालयको वेबसाइट तथा कार्यालय बाहिर टाँसिएको विवरणमा देखिन्छ । तर जिल्ला समन्वय समिति, जिल्ला सरकारी वकिल कार्यालय, कारागार कार्यालय र जिल्ला हुलाक कार्यालयको जिल्ला प्रशासन कार्यालयद्वारा सार्वजनिक विवरणमा सूचना अधिकारीको नाम तथा सम्पर्क नम्बर खाली देखिएको छ ।

यस्तै स्थानीय तहहरूले आफ्ना गतिविधिहरू सार्वजनिक गर्न तथा सञ्चार माध्यमहरूको सम्पर्क सहजताका लागि कर्मचारी तहमा सूचना अधिकारी तथा प्रवक्ता तोक्ने गरेका छन् । जिल्लाका ८ वटै स्थानीय तहहरूले प्रवक्ता तोकेका छन् ।

सोलुदूधकुण्ड नगरपालिकाले वडा नम्बर ६ का अध्यक्ष फुर्वा शेर्पालाई प्रवक्ता तोकेको छ । यस्तै थुलुङ दूधकोशीले भोजराज कार्की र खुम्बु पासाङल्हामुले ल्हाक्पा छिरी शेर्पालाई प्रवक्ता तोकेका छन् ।