गोम्बु शेर्पा कोशी प्रदेश सरकारको प्रवक्ता नियुक्त

भदौ ३, सोलुखुम्बु । कोशी प्रदेश सरकारले आन्तरिक मामिला तथा कानुन मन्त्री गोम्बु शेर्पालाई सरकारको प्रवक्ता तोकेको छ। नयाँ मन्त्रिपरिषद् विस्तारपछि बुधबार बसेको पहिलो मन्त्रिपरिषद् बैठकले मन्त्री शेर्पालाई सरकारको प्रवक्ताको जिम्मेवारी दिने निर्णय गरेको हो।

बैठकले मुख्यमन्त्री सम्मेलनको अवधारणा पत्र स्वीकृत गर्दै सम्मेलनको आवश्यक तयारी अघि बढाउने निर्णयसमेत गरेको आन्तरिक मामिला तथा कानुन मन्त्री तथा सरकारका प्रवक्ता गोम्बु शेर्पाले जानकारी दिनुभयो। त्यस्तै, मन्त्रिपरिषद् बैठकले विभिन्न तीनवटा समिति गठन गर्ने निर्णय गरेको छ। समितिहरूलाई तोकिएको जिम्मेवारीअनुसार काम अघि बढाउने बताइएको छ।

नयाँ मन्त्रिपरिषद् गठनपछि बसेको पहिलो बैठकले प्रदेश सरकारका आगामी कामलाई व्यवस्थित रूपमा अघि बढाउने तथा आवश्यक नीतिगत र संस्थागत तयारी गर्ने विषयमा समेत निर्णय गरेको सरकारका प्रवक्ता शेर्पाले बताउनुभयो।