खिजीदेम्बाका जनप्रतिनिधिले ३ दिनको तलबभत्ता बाढीपीडितलाई दिने

भाद्र ११, सोलुखुम्बु । ओखलढुंगाको खिजीदेम्बा गाउँपालिकाका जनप्रतिनिधि तथा कर्मचारिले बाढीपीडितको उद्धार तथा राहतका लागि आफ्नो तीन दिन बराबरको तलबभत्ता सहयोग गर्ने भएका छन्। गाउँ कार्यपालिकाको बैठकले विपद्बाट प्रभावित नागरिकको उद्धार, राहत, उपचार तथा पुनःस्थापनाका लागि सहयोग गर्ने निर्णय गरेको हो।

गाउँलालिका अध्यक्ष गम्बु शेर्पाको अध्यक्षतामा बसेको कार्यपालिक बैठकको निर्णयअनुसार गाउँपालिकाका जनप्रतिनिधि तथा सबै कर्मचारीको तीन दिन बराबरको तलबभत्ताबाट रकम कट्टा गरी नेपाल सरकारको प्रधानमन्त्री दैवी प्रकोप उद्धार कोषमा जम्मा गरिनेछ। भोटेकोशी र त्रिशूली नदीमा आएको अप्रत्याशित तथा आकस्मिक बाढीबाट ठूलो मानवीय तथा भौतिक क्षति भएको भन्दै गाउँपालिकाले दुःख व्यक्त गरेको छ। बाढीमा ज्यान गुमाउनेप्रति श्रद्धाञ्जली अर्पण गर्दै शोकसन्तप्त परिवारजनमा समवेदना व्यक्त गरिएको छ।

त्यस्तै, बाढीबाट घाइते भएकाको शीघ्र स्वास्थ्यलाभको कामना गर्दै घरबारविहीन, प्रभावित तथा बेपत्ता नागरिकको खोज, उद्धार, राहत र पुनःस्थापनामा खटिएका सुरक्षाकर्मी, स्थानीय नागरिक, स्वयंसेवक तथा सम्बन्धित निकायलाई गाउँपालिकाले धन्यवाद दिएको छ। गाउँपालिकाको निर्णयमा विपद्को समयमा प्रभावित नागरिकको उद्धार तथा राहतका लागि सबै पक्षलाई सहयोग र सहकार्य गर्नसमेत आग्रह गरिएको छ। खिजीदेम्बा गाउँपालिकाले यसअघि पनि विपद् प्रभावितलाई सहयोग तथा राहतका लागि आवश्यक पहल गर्दै आएको छ।