सम्पर्कविहीन सोलुखुम्बुका नागरिकको खोजी तथा उद्धारका लागि सर्वपक्षीय समिति गठन

सबिना राई, भदौ ११, सोलुखुम्बु । चीनको तिब्बत हुँदै भोटेकोशी नदीमा आएको बाढीबाट प्रभावित तथा सम्पर्कविहीन सोलुखुम्बुका नागरिकको खोजी, उद्धार र पहिचानका लागि सर्वपक्षीय छलफल गरी समिति गठन गरिएको छ । प्रतिनिधि सभा सदस्य प्रकाश सिंह कार्कीको अगुवाइमा बिहीबार काठमाडौंमा भएको छलफलमा सोलुखुम्बुबाट प्रतिनिधित्व गर्ने संघीय तथा प्रदेश सांसद, राजनीतिक दलका जिल्ला नेतृत्व र प्रभावित परिवारका सदस्यहरूको सहभागिता रहेको थियो ।

छलफलमा प्रतिनिधि सभा सदस्य रिना उप्रेती केसी, गीता गुरुङ, राष्ट्रिय सभा सदस्य सोनाम ग्याल्जेन शेर्पा, नेपाली कांग्रेसका केन्द्रीय सदस्य आङ्गेलु शेर्पा, कांग्रेस सोलुखुम्बुका सभापति नाम्गेल जाङ्बु शेर्पा तथा नेकपा एमाले सोलुखुम्बुका जिल्ला अध्यक्ष डुफकुमार बास्तोलालगायतको सहभागिता थियो । बैठकले सम्पर्कविहीन नागरिकको खोजी तथा उद्धारका लागि प्रतिनिधि सभा सदस्य कार्कीको संयोजकत्वमा सर्वपक्षीय समिति गठन गरेको छ ।

समितिमा प्रतिनिधि सभा सदस्य रिना उप्रेती केसी र गीता गुरुङ, राष्ट्रिय सभा सदस्य सोनाम ग्याल्जेन शेर्पा, कोशी प्रदेशका मन्त्री गोम्बु शेर्पा, प्रदेश सभा सदस्य बुद्धिकुमार राजभण्डारी र डोल्मा तामाङ सदस्य छन् । त्यस्तै, जिल्ला समन्वय समितिका प्रमुख कृष्णप्रसाद निरौला, सोलुखुम्बुका सबै स्थानीय तहका प्रमुख, राष्ट्रिय स्वतन्त्र पार्टी, नेपाली कांग्रेस, नेकपा एमाले, नेकपा तथा श्रम संस्कृति पार्टीका जिल्ला नेतृत्वलाई पनि समितिको सदस्यमा राखिएको छ ।

समितिले गृह मन्त्रालय तथा विपद् व्यवस्थापनसँग आवश्यक समन्वय गरी सम्पर्कविहीन नागरिकको खोजी, उद्धार तथा पहिचानका लागि पहल गर्ने निर्णय गरेको छ । समितिको सम्पर्क कार्यालय काठमाडौं महानगरपालिका–१, नक्सालस्थित भगवतीबहालमा रहने जनाइएको छ ।