भोटेकोशी बाढी : सोलुखुम्बुका सम्पर्कविहीनको संख्या ४७ पुग्यो

सबिना राई, भदौ ११, सोलुखुम्बु । चीनको तिब्बत हुँदै भोटेकोशी नदीमा आएको बाढीमा परी सोलुखुम्बुका ४७ जना नागरिक सम्पर्कविहीन रहेको विवरण सार्वजनिक भएको छ । उपलब्ध विवरणअनुसार नेचासल्यान गाउँपालिकाका दुई, सोलुदुधकुण्ड नगरपालिकाका १६, थुलुङ दूधकोशी गाउँपालिकाका चार, माप्य दूधकोशी गाउँपालिकाका १०, सोताङ गाउँपालिकाका नौ, महाकुलुङ गाउँपालिकाका तीन र लिखुपिके गाउँपालिकाका तीन जना सम्पर्कविहीन छन् । सम्पर्कविहीन हुनेमा सोलुदुधकुण्ड नगरपालिका–१० का पासाङ काजी तामाङ, पासाङ तामाङ, छिरिङ तामाङ, सागर तामाङ, रिन्जी तामाङ, दोर्जी तामाङ र रोजित तामाङ छन् ।

यस्तै वडा नं. ८ का विकास श्रेष्ठ, सुरेश मगर, अनिश मगर र धनबहादुर तामाङ तथा वडा नं. ११ का देवबहादुर मगर, पोक्ची तामाङ र काजी शेर्पा रहेको विवरणमा उल्लेख छ । थुलुङ दूधकोशी गाउँपालिकाबाट बाबुराम खत्री, डम्बर राई, पान्देउ राई र बिनोद बस्नेत सम्पर्कविहीन छन् । माप्य दूधकोशी गाउँपालिकाबाट तुलाबहादुर मगर, हर्कबहादुर मगर, प्रकाश मगर, गोकुल मगर, प्रम मगर, कुमार मगर, बालकुमार मगर, नुरु जाङ्बु शेर्पा, ओमनाथ राई र प्रेम मगर सम्पर्कविहीन रहेको जनाइएको छ । सोताङ गाउँपालिकाबाट गेल्जे शेर्पा, लोप्सान शेर्पा, गेन्बु शेर्पा, प्रेम नाछिरिङ, सोना शेर्पा, कर्णबहादुर राई, प्रेमकुमार राई र अम्बिर नाछिरिङ तथा महाकुलुङ गाउँपालिकाबाट सुसान्त कुलुङ, निरकुमार राई र शुभधन राई सम्पर्कविहीन रहेको विवरणमा उल्लेख छ । त्यसैगरी लिखुपिके गाउँपालिकाबाट दिलबहादुर भुजेल र निमा शेर्पा तथा नेचासल्यान गाउँपालिकाबाट आङफुर्वा शेर्पा र साङ्गे शेर्पा सम्पर्कविहीन रहेको जनाइएको छ ।

माप्य दूधकोशी गाउँपालिकाका नवीन घिमिरेको नाम पनि सूचीमा समावेश गरिएको छ । यद्यपि, जिल्ला प्रहरी कार्यालय सोलुखुम्बुले भने भोटेकोशी बाढीमा जिल्लाका ३७ जना नागरिक सम्पर्कविहीन भएको आधिकारिक विवरण दिएको छ । प्रहरीका अनुसार सम्पर्कविहीनको सूचीमा रहेका लिखुपिके गाउँपालिकाका दोर्जी शेर्पा भने सम्पर्कमा आइसकेका छन् । यससँगै सम्पर्कविहीन नागरिकको सङ्ख्याबारे स्थानीय तह तथा अन्य स्रोतबाट सार्वजनिक विवरण र प्रहरीको आधिकारिक विवरणमा फरक देखिएको छ । प्रहरी कार्यालयले प्राप्त सूचना तथा सम्पर्कमा आएका व्यक्तिको विवरण अद्यावधिक गर्दै लगिएको जनाएको छ ।

बाढीमा परी सम्पर्कविहीन भएका नागरिकको खोजी तथा उद्धारका लागि प्रतिनिधि सभा सदस्य प्रकाश सिंह कार्कीको अगुवाइमा सर्वपक्षीय पहलसमेत थालिएको छ । यस क्रममा संघीय तथा प्रदेश सांसद, स्थानीय तहका प्रमुख, राजनीतिक दलका जिल्ला नेतृत्व र प्रभावित परिवारका प्रतिनिधिको सहभागितामा छलफल गरी सरकारसँग आवश्यक समन्वय गर्ने निर्णय गरिएको छ ।सम्पर्कविहीन नागरिकका परिवार तथा आफन्तलाई छुटेका नाम वा नयाँ सूचना भए सम्बन्धित निकायमा जानकारी गराउन आग्रह गरिएको छ । बाढी प्रभावित क्षेत्रमा खोजी, उद्धार तथा सम्पर्कविहीन नागरिकको पहिचानलाई प्राथमिकतामा राखेर आवश्यक समन्वय भइरहेको जनाइएको छ ।