ताप्लीका जनप्रतिनिधि, कर्मचारी र शिक्षकले बाढीपीडितलाई १९ लाख ४० हजार सहयोग जुटाउने

भदौ १७, सोलुखुम्बु । उदयपुरको ताप्ली गाउँपालिकाले रसुवाको भोटेकोशी नदीमा आएको विनाशकारी बाढीबाट प्रभावित तथा ज्यान गुमाएका परिवारका लागि राहत तथा उद्धार सहयोगस्वरूप १९ लाख ४० हजार ८२७ रुपियाँ प्रदान गर्ने भएको छ । गाउँ कार्यपालिकाको बैठकले गाउँपालिकाका जनप्रतिनिधि, कर्मचारी, शिक्षक तथा विद्यालयमा कार्यरत कर्मचारीबाट रकम संकलन गरी प्रधानमन्त्री दैवी प्रकोप उद्धार कोषमा जम्मा गर्ने निर्णय गरेको हो ।

गाउँपालिकाका अनुसार स्थानीय विपद् कोषबाट पाँच लाख रुपियाँ, जनप्रतिनिधिबाट एक लाख ६५ हजार ४०० रुपियाँ, गाउँपालिकाअन्तर्गतका कर्मचारीबाट पाँच लाख ६६ हजार ३६० रुपियाँ तथा गाउँपालिकाअन्तर्गतका विद्यालयका शिक्षक तथा कर्मचारीबाट सात लाख नौ हजार ६७ रुपियाँ सहयोग गरिनेछ । यसरी कुल १९ लाख ४० हजार ८२७ रुपियाँ प्रधानमन्त्री दैवी प्रकोप उद्धार कोषमा जम्मा गरिने भएको हो ।

गाउँपालिकाका अध्यक्ष ढुङ्गराज विश्वकर्माका अनुसार भदौ १० गते रसुवा जिल्लाको सीमा क्षेत्र र तल्लो तटीय क्षेत्रमा भोटेकोशी नदीमा आएको भीषण बाढीबाट भएको जनधनको क्षतिप्रति गाउँपालिकाले दुःख व्यक्त गर्दै प्रभावित नागरिकको राहत तथा उद्धारमा सहयोग गर्ने निर्णय गरेको हो । बाढीमा परी मृत्यु भएका व्यक्तिप्रति श्रद्धाञ्जली व्यक्त गर्दै गाउँपालिकाले शोकसन्तप्त परिवारजनप्रति समवेदना तथा घाइतेको शीघ्र स्वास्थ्यलाभको कामना गरेको छ ।

गाउँपालिकाका प्रमुख प्रशासकीय अधिकृत सन्तोष भट्टराईले राष्ट्रिय विपद्को समयमा राष्ट्रसेवक कर्मचारी, शिक्षक तथा जनप्रतिनिधिको महत्वपूर्ण दायित्व हुने भएकाले सबैलाई सहयोगमा एकजुट हुन आह्वान गरिएको बताउनुभयो । उहाँले विपद्को समयमा सहयोग, समन्वय, ऐक्यबद्धता र सामूहिक हातेमालो आवश्यक रहेको भन्दै गाउँपालिकाभित्रका कर्मचारी तथा शिक्षकलाई सहयोगका लागि समन्वय गरिएको जानकारी दिनुभयो ।

गाउँपालिकाले देश तथा विदेशमा रहेका युवा, आमाबुवा, दाजुभाइ, दिदीबहिनी, जनप्रतिनिधि, राजनीतिक दलका प्रमुख तथा प्रतिनिधि, समाजसेवी, बुद्धिजीवी, विभिन्न निकाय तथा सङ्घसंस्थालाई समेत विपद् प्रभावितको राहत, उद्धार तथा पुनःस्थापनामा सहयोग गर्न आह्वान गरेको छ ।