ऐसेलुखर्क गाउँपालिकाले काठमाडौँ र इटहरीमा सामाजिक सुरक्षा भत्ता शिविर सञ्चालन गर्ने

भदौ १८, सोलुखुम्बु । खोटाङको ऐँसेलुखर्क गाउँपालिकाले विभिन्न कारणले हाल काठमाडौँ तथा पूर्वी तराईका क्षेत्रमा बसोबास गर्दै आएका सामाजिक सुरक्षा भत्ता प्राप्त गर्ने नागरिकलाई लक्षित गरी सामाजिक सुरक्षा भत्ता दर्ता तथा नवीकरण शिविर सञ्चालन गर्ने भएको छ । गाउँपालिकाले सार्वजनिक गरेको सूचनाअनुसार काठमाडौँमा आगामी भदौ २३ र २४ गते शिविर सञ्चालन हुनेछ ।

शिविर काठमाडौँ चाबहिल चोकस्थित एसी कम्प्लेक्सनजिक रहेको कुन्जी एकेडेमीमा सञ्चालन गरिने गाउँपालिकाले जनाएको छ । त्यस्तै, इटहरी उपमहानगरपालिका–५, काव्यवाटिका, पचरुखीमा भदौ २७ र २८ गते सामाजिक सुरक्षा भत्ता दर्ता तथा नवीकरण शिविर सञ्चालन हुने सूचनामा उल्लेख छ । गाउँपालिकाका अनुसार स्थायी ठेगाना ऐँसेलुखर्क गाउँपालिका भएका तर हाल काठमाडौँ तथा पूर्वी तराईका विभिन्न क्षेत्रमा बसोबास गरिरहेका नागरिकलाई लक्षित गरी शिविर सञ्चालन गर्न लागिएको हो ।

सामाजिक सुरक्षा भत्ता दर्ता तथा नवीकरणका लागि आवश्यक कागजातसहित तोकिएको स्थानमा उपस्थित भई सेवा लिन गाउँपालिकाले सम्बन्धित सबैमा आग्रह गरेको छ । गाउँपालिकाले सेवाग्राहीको सहजताका लागि सातवटै वडाका वडा अध्यक्षलाई सम्पर्क व्यक्तिका रूपमा तोकेको छ ।

गाउँपालिकाका अनुसार वडा नम्बर १ राखाबाङ्देलका वडा अध्यक्ष पुरुषोत्तम राजभण्डारी, वडा नम्बर २ बाकाचोलका वडा अध्यक्ष नन्दकुमार तामाङ, वडा नम्बर ३ ऐँसेलुखर्कका वडा अध्यक्ष टेकेन्द्र राजभण्डारी, वडा नम्बर ४ जलेश्वरीका वडा अध्यक्ष भक्तबहादुर तामाङ, वडा नम्बर ५ महेश्वरीका वडा अध्यक्ष टंकराम राई, वडा नम्बर ६ ज्यामिरेका वडा अध्यक्ष सुनिल राई र वडा नम्बर ७ माक्पाका वडा अध्यक्ष अरुण राईलाई सम्पर्क गर्न सकिने गाउँपालिकाले जनाएको छ ।