सोलुखुम्बुमा भालुको आतङ्क बढेको भन्दै वैज्ञानिक अध्ययन र व्यवस्थापन गर्न सांसद कार्कीको माग

भदौ १८, सोलुखुम्बु । नेपाली कांग्रेसका सांसद प्रकाशसिंह कार्कीले सोलुखुम्बुमा जङ्गली भालुको आतङ्क बढेको भन्दै भालुको वासस्थान पहिचान गरी वैज्ञानिक ढङ्गबाट व्यवस्थापन गर्न सरकारसँग माग गर्नुभएको छ । बिहीबार बसेको प्रतिनिधिसभाको बैठकमा बोल्दै सांसद कार्कीले केही दिनअघि सोलुखुम्बुको सोलुदुधकुण्ड नगरपालिका–२ का स्थानीय ग्याल्जेश शेर्पालाई भालुले आक्रमण गरेको उल्लेख गर्दै मानव बस्तीमा जङ्गली भालुको आवतजावत बढ्दै गएको बताउनुभयो ।

उहाँले गाउँबस्ती आसपास भालुको बिगबिगी बढ्दा स्थानीयवासी त्रसित बनेको र विद्यार्थीलाई समेत आवतजावतमा समस्या भइरहेको बताउनुभयो । मानव बस्तीमा वन्यजन्तुको प्रवेश बढ्नुको कारण पहिचान गरी दीर्घकालीन समाधान खोज्नुपर्नेमा जोड दिँदै सांसद कार्कीले भालुको वासस्थान र गतिविधिबारे वैज्ञानिक अध्ययन गर्न सरकारको ध्यानाकर्षण गराउनुभयो । उहाँले भालुको प्राकृतिक वासस्थान पहिचान, संरक्षण तथा आवश्यक व्यवस्थापनका लागि सम्बन्धित निकायबीच समन्वय गरी प्रभावकारी कदम चाल्न सरकारसँग आग्रह गर्नुभयो ।

यस्तै सांसद कार्कीले भोटेकोशी बाढीमा परी बेपत्ता नागरिकको खोजी तथा उद्धारका लागि विशेष टोली परिचालन गर्न माग गर्नुभयो । उहाँले बेपत्ता नागरिकका परिवारको पीडा शब्दमा व्यक्त गर्न नै नसकिने किसिमको रहेको भन्दै खोज तथा उद्धारका लागि विशेष टोली परिचालन गर्न सरकारको ध्यानाकर्षण गराउनुभयो । साथै उहाँले उक्त बाढीमा सोलुखुम्बुका ५१ जना सम्पर्कविहीन रहेको भन्दै बेपत्ता नागरिकबारे सरकारले यथाशीघ्र जानकारी गराउनुभयो ।