खोटाङमा स्वर्णविन्दु प्राशनसम्बन्धी अभिमुखीकरण कार्यक्रम सम्पन्न

भदौ १८, खोटाङ ।  खोटाङमा एक वर्षदेखि पाँच वर्षसम्मका बालबालिकालाई स्वर्णविन्दु प्राशन खुवाइने भएको छ। जिल्ला आयुर्वेद स्वास्थ्य केन्द्र खोटाङले यही भदौ २३ गते मंगलबार स्वर्णविन्दु प्राशन कार्यक्रम सञ्चालन गर्ने जनाएको हो । कार्यक्रमबारे जानकारी गराउने उद्देश्यले बिहीबार जिल्ला आयुर्वेद स्वास्थ्य केन्द्रको आयोजनामा स्वर्णविन्दु प्राशनसम्बन्धी अभिमुखीकरण कार्यक्रम सम्पन्न भएको छ। कार्यक्रममा केन्द्रका प्रमुख डा. सरविन्द्रप्रसाद यादवले स्वर्णविन्दु प्राशनको महत्व, प्रयोग विधि तथा बालबालिकाको स्वास्थ्यमा पुग्ने लाभबारे जानकारी गराउनुभएको थियो ।अभिमुखीकरण कार्यक्रममा जिल्ला समन्वय समितिका प्रमुख, प्रमुख जिल्ला अधिकारी, विभिन्न स्थानीय तहका स्वास्थ्य शाखाका प्रतिनिधि, जिल्ला अस्पताल तथा खोप केन्द्रका प्रतिनिधि, विभिन्न विद्यालयका शिक्षक प्रतिनिधि र महिला स्वास्थ्य स्वयंसेविकाको सहभागिता रहेको थियो। कार्यक्रमलाई प्रभावकारी रूपमा सञ्चालन गर्न स्थानीय तह, स्वास्थ्य संस्था, विद्यालय तथा महिला स्वास्थ्य स्वयंसेविकाबीच आवश्यक समन्वय र सहकार्य गर्ने विषयमा समेत छलफल गरिएको जनाइएको छ ।

जिल्ला आयुर्वेद स्वास्थ्य केन्द्रका अनुसार बालबालिकाको शारीरिक तथा मानसिक स्वास्थ्य सुदृढीकरण गर्ने उद्देश्यले स्वर्णविन्दु प्राशनसम्बन्धी कार्यक्रम सञ्चालन हुँदै आएको छ । स्वर्णविन्दु प्राशन भदौ २३ गते मंगलबारदेखि जिल्ला आयुर्वेद स्वास्थ्य केन्द्रमा बिहान ७ बजेदेखि १० बजेसम्म खुवाइनेछ । कार्यक्रममा सहभागी गराउँदा बालबालिकाको जन्मदर्ताको प्रमाणपत्र वा खोप कार्ड अनिवार्य रूपमा लिएर आउन केन्द्रले अभिभावकलाई आग्रह गरेको छ ।