भदौ १९, सोलुखुम्बु । भदौ १० गते रसुवाको भोटेकोशी नदीमा आएको बाढीका कारण बेपत्ता भएका सोलुखुम्बुका नागरिकहरूको पहिचानका लागि डिएनए परीक्षण प्रक्रिया अघि बढाइएको छ। फेला परेका शव तथा शरीरका विभिन्न अङ्गहरूको सनाखत गर्न पहिलो चरणमा आफन्तजनको रगतको नमुना सङ्कलन गर्न लागिएको हो।
जिल्ला प्रहरी कार्यालय सोलुखुम्बुका अनुसार यही भदौ २१ गते आइतबार दक्ष स्वास्थ्यकर्मीमार्फत नमुना सङ्कलनको कार्य गरिनेछ। सोलुखुम्बु स्थायी ठेगाना भई बाढीमा परेर हालसम्म फेला पर्न नसकेका व्यक्तिका नजिकका रगतको नाता (फस्ट डिग्री रिलेटिभ) पर्ने बाबु, आमा, छोरा वा छोरीमध्ये कुनै एक जनालाई नमुना उपलब्ध गराउन आग्रह गरिएको छ।
नमुना सङ्कलन कार्य आइतबार बिहान १० बजेदेखि साँझ ५ बजेसम्म सञ्चालन हुने प्रहरीले जनाएको छ। नमुना दिन आउने आफन्तजनले मृतक वा हराएका व्यक्तिको परिचय खुल्ने कागजात, नमुना दिने आफ्नै परिचय तथा नाता खुल्ने कागजात र दुई प्रति पासपोर्ट साइजको फोटो अनिवार्य रूपमा साथमा लिएर आउनुपर्नेछ।
डिएनए नमुना सङ्कलनमा सहभागी हुन आउनुअघि जिल्ला प्रहरी कार्यालयमा अग्रिम जानकारी गराउन समेत अनुरोध गरिएको छ। यस सम्बन्धी थप सोधपुछ वा समन्वयका लागि जिल्ला प्रहरी कार्यालय (९८५२८९०१९९० तथा सूचना अधिकारी (९८५२८२८००२०) सँग सम्पर्क गर्न सकिने प्रहरीले जनाएको छ।
Discussion about this post