आज कृष्णजन्माष्टमी, साेलुका कृष्ण मन्दिरमा कृष्णभक्तको भिड

भाद्र १९, सोलुखुम्बु । आज कृष्णजन्माष्टमी । भगवान् श्रीकृष्णको जन्मदिनको स्मरणमा मनाइने श्रीकृष्ण जन्माष्टमी पर्व आज सोलुखुम्बुसहित देशभर धार्मिक श्रद्धा र भक्तिभावका साथ मनाइँदैछ। कृष्ण मन्दिर तथा घरघरमा पूजाआराधना, व्रत, भजनकीर्तन र मध्यरातमा कृष्ण जन्मोत्सव मनाउने तयारी गरिएको छ । जन्माष्टमीलाई अन्य समुदायले जस्तै नेवार समुदायले पनि धार्मिक तथा सांस्कृतिक महत्वका साथ मनाउने गरेको पाइन्छ। नेवार समुदायमा भने स्थानीय गुठी, परिवार र समुदायअनुसार पूजा तथा जन्मोत्सवका विधिमा केही भिन्नता देखिन्छ। गुठी परम्परा नेवार समुदायको धार्मिक, सामाजिक तथा सांस्कृतिक गतिविधिको महत्वपूर्ण आधारका रूपमा रहँदै आएको संस्कृतिसम्बन्धी अध्ययनले देखाएको छ।

सोलुखुम्बुमा नेवार समुदायले आज जिल्लास्थीत विभिन्न स्थानमा रहका कृष्ण मन्दिरहरुमा पुजाअर्चना गरेर जन्माष्टमी मनाउँदैछन् । दिपक राजभण्डारीका अनुसार सदरमुकाम सल्लेरी स्थीत दोर्पुबजारमा रहेको कृष्ण मन्दिरमा भक्तजनहरुको विहानै देखी भिड लागेको छ । यहाँ पनि परम्परागत रूपमा कृष्णको पूजा, व्रत तथा प्रसाद चढाउने गरिन्छ । विशेषगरी बालकृष्णको स्वरूपलाई केन्द्रमा राखेर पूजा गर्ने, परिवार तथा आफन्त भेला हुने र धार्मिक आस्थाअनुसार भजनकीर्तन गर्ने प्रचलन रहेको उहाँले बताउनुभयो। जन्माष्टमीमा भगवान् कृष्णको जन्म मध्यरातमा भएको धार्मिक विश्वासअनुसार राति विशेष पूजा गर्ने परम्परा छ।

कतिपय स्थानमा बालबालिकालाई कृष्णको स्वरूपमा सजाउने, दही, मख्खनलगायतका परिकार प्रसादका रूपमा चढाउने तथा झुला झुलाउने परम्परासमेत रहेको छ। राजभण्डारीका अनुसार सोलुखुम्बुमा बसोबास गर्ने नेवार समुदायले आफ्नो मौलिक संस्कृति र पारिवारिक परम्परालाई निरन्तरता दिँदै जन्माष्टमी मनाउँदै आएको छ। उहाँका अनुसार पर्व धार्मिक आस्थासँगै पुस्तौँदेखि हस्तान्तरण हुँदै आएको सांस्कृतिक पहिचान जोगाउने अवसरसमेत बनेको छ।