गञ्जेडाँडा हत्या प्रकरण : अभियुक्त कारागार र दुई बालक सुधारगृह चलान

सोलुखुम्बु, भदौ २० गते । सोलुदुधकुण्ड नगरपालिका–११ गञ्जेडाँडाका ४५ वर्षीय तोइबहादुर कटुवालको हत्या अभियोगमा पक्राउ परेका तीन जनालाई अदालतको आदेशपछि पूर्पक्षका लागि कारागार तथा बालसुधार गृह पठाइएको छ । जिल्ला अदालत सोलुखुम्बुले भदौ १६ गते दिएको आदेशबमोजिम मुख्य प्रतिवादी सोलुदुधकुण्ड–११ राम्पाका २१ वर्षीय विनोद खड्कालाई कारागार कार्यालय सल्लेरी र घटनामा संलग्न अन्य दुई बालकलाई बालसुधार गृह विराटनगर पठाइएको हो ।

गत साउन २३ गते बिहान कटुवाल आफ्नै कोठाभित्र मृत अवस्थामा फेला परेका थिए । घटनाको प्रकृति शङ्कास्पद देखिएपछि जिल्ला प्रहरी कार्यालय सोलुखुम्बुबाट प्रहरी नायब निरीक्षक नविन राजा बुढाथोकीको कमाण्डमा खटिएको विशेष टोलीले अनुसन्धान अघि बढाएको थियो ।

प्रहरी अनुसन्धानका क्रममा नियन्त्रणमा लिइएका खड्काले साउन २२ गते बेलुकी सँगै मादक पदार्थ सेवन गर्ने क्रममा विवाद हुँदा चक्कु प्रहार गरी घाँटी रेटेर कटुवालको हत्या गरेको स्वीकार गरेको प्रहरीले जनाएको छ । हत्यामा संलग्न अन्य दुई बालकलाई समेत नियन्त्रणमा लिई आवश्यक अनुसन्धान पूरा गरेर अदालतमा पेस गरिएको जिल्ला प्रहरी कार्यालय सोलुखुम्बुका सूचना अधिकारी निर्मल थापाले जानकारी दिनुभयो । अदालतको आदेशसँगै अभियुक्तहरूलाई थुनामा पठाइएको हो ।