५२ सम्पर्कविहीनका परिवारलाई सोलुदूधकुण्डले ५० हजार राहत दिने

भदौ २१, सोलुखुम्बु । सोलुखुम्बुको सोलुदूधकुण्ड नगरपालिकाले रसुवाको भोटेकोशी बाढीपछि सम्पर्कविहीन रहेका जिल्लाबासीका परिवारलाई राहत उपलब्ध गराउने भएको छ। नगरपालिकाले भोटेकोशी बाढीमा परी सम्पर्कविहीन भएका ५२ जनाका परिवारलाई प्रतिपरिवार ५० हजार रुपैयाँका दरले राहत उपलब्ध गराउने निर्णय गरेको हो ।

नगरप्रमुख नाम्गेल जाङ्बु शेर्पाका अनुसार नगर कार्यपालिकाबाट निर्णय गरेर सम्पर्कविहीन जिल्लाबासीका परिवारलाई राहत उपलब्ध गराउन लागिएको हो । गत भदौ १० गते रसुवाको भोटेकोशी नदीमा आएको विनाशकारी बाढीपछि पर्यटन तथा निर्माण क्षेत्रको कामका सिलसिलामा रसुवा पुगेका सोलुखुम्बुका ५२ जना सम्पर्कविहीन रहेको जिल्ला प्रहरी कार्यालय सोलुखुम्बुले जनाएको छ ।

सम्पर्कविहीनमध्ये ४९ जनाका परिवारले पहिचानका लागि डीएनए परीक्षणको नमुनासमेत दिइसकेका छन्। तर, लामो समय बितिसक्दा पनि उनीहरूमध्ये हालसम्म कसैको अवस्था यकिन हुन नसकेको जिल्ला प्रशासन कार्यालय सोलुखुम्बुले जनाएको छ । आफन्तको खोजी र उद्धारको प्रतीक्षामा रहेका परिवारलाई तत्कालीन राहत तथा सहयोग उपलब्ध गराउने उद्देश्यले नगरपालिकाले प्रतिपरिवार ५० हजार रुपैयाँ दिने निर्णय गरेको हो । यसबाट नगरपालिकाले ५२ परिवारलाई कुल २६ लाख रुपैयाँ राहत उपलब्ध गराउनेछ।