भोटेकोशी बाढीमा हराइरहेका सोलुखुम्बुका १० जनाका आफन्तबाट डीएनए नमुना संकलन

भदौ २२, सोलुखुम्बु । भदौ १० गते रसुवा जिल्लास्थित भोटेकोशी नदीमा आएको बाढीका कारण हराइरहेका सोलुखुम्बुका १० जनाका आफन्तबाट डीएनए परीक्षणका लागि नमुना संकलन गरिएको छ । बाढीपछि आफन्तजन फेला नपरी हराइरहेका तथा हालसम्म सम्पर्कमा नआएका नागरिकको पहिचान गर्ने उद्देश्यले आइतबार जिल्ला प्रहरी कार्यालय, सोलुखुम्बुमा उपस्थित भएका आफन्तजनबाट डीएनए परीक्षणका लागि नमुना संकलन गरिएको हो ।

जिल्ला प्रहरी कार्यालय सोलुखुम्बुका प्रहरी निरीक्षक एवं सूचना अधिकारी निर्मल थापाका अनुसार भोटेकोशी बाढीपछि फेला परेका शव, शरीरका कुनै अंग वा भागको पहिचान तथा एकिन गर्न सहयोग पुर्याउने उद्देश्यले हराइरहेका व्यक्तिका आफन्तबाट नमुना लिइएको हो । उहाँका अनुसार बाढीमा हराइरहेका व्यक्तिको पहिचान हुन नसकेको अवस्थामा डीएनए परीक्षणबाट शव वा शरीरका अंग–भाग आफन्तसँग मिलान गरी पहिचान गर्न सकिनेछ ।

भोटेकोशी नदीमा आएको बाढीका कारण ठूलो जनधनको क्षति भएको थियो । बाढीपछि विभिन्न स्थानमा शव तथा शरीरका अंगहरू फेला पर्ने क्रम जारी रहेकाले पहिचानका लागि डीएनए परीक्षणलाई महत्वपूर्ण आधारका रूपमा लिइएको प्रहरीले जनाएको छ । सोलुखुम्बुबाट हराइरहेका व्यक्तिका आफन्तको नमुना संकलन गरी आवश्यक परीक्षण तथा अभिलेख व्यवस्थापनको प्रक्रिया अघि बढाइएको प्रहरी निरीक्षक थापाले जानकारी दिनुभयो ।