भदौ २३, सोलुखुम्बु । हिमालयन ट्रष्ट नेपालले हिमालयन ट्रष्ट न्यूजिल्याण्डका तर्फबाट रसुवा बाढीबाट प्रभावित समुदायको सहयोगका लागि प्रधानमन्त्री दैवी प्रकोप उद्धार कोषमा ५० लाख रुपियाँ सहयोग गरेको छ । ट्रष्टले सोमबार उक्त रकम प्रधानमन्त्री दैवी प्रकोप उद्धार कोषमा हस्तान्तरण गरेको हो । बाढीबाट प्रभावित समुदायको आपत्कालीन उद्धार, राहत तथा पुनर्स्थापनाका लागि सहयोग पुगोस् भन्ने उद्देश्यले रकम प्रदान गरिएको ट्रष्टले जनाएको छ ।
हिमालयन ट्रष्ट नेपालको कार्यक्षेत्र मुख्यतः सोलुखुम्बुमा केन्द्रित रहे पनि विपत्तिबाट प्रभावित सबै समुदायप्रति ऐक्यबद्धता जनाउँदै सहयोग गरिएको ट्रष्टको भनाइ छ । प्राकृतिक विपत्तिबाट सबैभन्दा बढी प्रभावित परिवार तथा समुदायलाई राहत पुर्याउन सहयोग पुग्ने विश्वास व्यक्त गर्दै ट्रष्टले यस कठिन अवस्थामा प्रभावित समुदायसँग आफूहरू साथमा रहेको जनाएको छ । ट्रष्टले बाढी तथा विपत्तिबाट प्रभावित सम्पूर्ण परिवारप्रति हार्दिक सहानुभूति व्यक्त गर्दै राहत तथा पुनर्स्थापनाका प्रयासमा सहयोग पुर्याउने प्रतिबद्धता जनाएको छ ।
Discussion about this post