भुट्टार स्वास्थ्य चौकी पालिकाकै पहिलो तथा जिल्लाको दोस्रो ‘पोषणमैत्री स्वास्थ्य संस्था’ घोषणा

भदौ २३, सोलुखुम्बु । उदयपुरको रौतामाई गाउँपालिका–२ स्थित भुट्टार स्वास्थ्य चौकी गाउँपालिकाकै पहिलो तथा जिल्लाको दोस्रो ‘पोषणमैत्री स्वास्थ्य संस्था’ घोषणा भएको छ । पोषणमैत्री स्वास्थ्य संस्था कार्यान्वयन निर्देशिका, २०७९’ तथा ‘पोषणमैत्री स्थानीय शासन कार्यान्वयन कार्यविधि, २०८०’ ले निर्धारण गरेका आवश्यक सूचक तथा मापदण्ड पूरा गरेपछि स्वास्थ्य चौकीलाई पोषणमैत्री स्वास्थ्य संस्था घोषणा गरिएको हो ।

जिल्ला स्वास्थ्य कार्यालय उदयपुरका अनुसार जिल्लामा यसअघि रुपाटार स्वास्थ्य चौकीलाई पहिलो पोषणमैत्री स्वास्थ्य संस्था घोषणा गरिएको थियो । भुट्टार स्वास्थ्य चौकी जिल्लाको दोस्रो पोषणमैत्री स्वास्थ्य संस्था बनेको हो । पोषणमैत्री स्वास्थ्य संस्था घोषणाका लागि स्वास्थ्य संस्थाले पोषणसम्बन्धी सेवा, परामर्श, स्वास्थ्य शिक्षा तथा समुदायमा पोषण प्रवर्धनसँग सम्बन्धित विभिन्न सूचक र मापदण्ड पूरा गर्नुपर्ने व्यवस्था छ ।

स्वास्थ्य चौकीलाई पोषणमैत्री घोषणा गर्ने कार्यक्रममा रौतामाई गाउँपालिका, वल्र्ड भिजन इन्टरनेसनल नेपाल, मानव अधिकार तथा वातावरण विकास केन्द्र (हुरेन्डेक) उदयपुर र जल्पा एकीकृत विकास समाज उदयपुरको सहयोग रहेको थियो । कार्यक्रममा रौतामाई गाउँपालिकाका अध्यक्ष वीरेन्द्रकुमार मगर, उपाध्यक्ष भूपेन्द्रबहादुर थापा, कार्यवाहक वडाध्यक्ष अनिल मोते, स्वास्थ्य व्यवस्थापन समितिका अध्यक्षलगायतको उपस्थिति थियो ।

त्यसैगरी वडा कार्यालयका पदाधिकारी, स्वास्थ्य संस्था प्रमुख, विभिन्न सङ्घसंस्थाका प्रतिनिधि, टोल विकास संस्था, विद्यालयका प्रतिनिधि, महिला स्वास्थ्य स्वयंसेविका, बालक्लब सञ्जाल, राजनीतिक दलका प्रतिनिधि तथा स्थानीय बुद्धिजीवीको सहभागिता रहेको थियो । पोषणमैत्री स्वास्थ्य संस्था घोषणासँगै स्वास्थ्य चौकीबाट प्रदान हुने स्वास्थ्य तथा पोषणसम्बन्धी सेवाको प्रभावकारिता बढ्ने र स्थानीयस्तरमा पोषणको अवस्था सुधार गर्न थप सहयोग पुग्ने अपेक्षा गरिएको छ ।