चिशंखुगढीको एकीकृत सेवा शिविरबाट दुई सयभन्दा बढी लाभान्वित

भदौ २५, सोलुखुम्बु । ओखलढुंगाको चिशंखुगढी गाउँपालिकाले काठमाडौँमा सञ्चालन गरेको एकीकृत सेवा प्रवाह शिविर सम्पन्न भएको छ । गाउँपालिकाले भदौ २३ र २४ गते काठमाडौँको सुकेधारास्थित नवदुर्गा पार्टी प्यालेसमा शिविर सञ्चालन गरेको हो । काठमाडौँ उपत्यका तथा आसपासका क्षेत्रमा बसोबास गर्दै आएका चिशंखुगढी गाउँपालिकाका नागरिकलाई स्थानीय तहबाट प्रवाह हुने सेवा सहज, सरल र प्रभावकारी रूपमा उपलब्ध गराउने उद्देश्यले शिविर आयोजना गरिएको गाउँपालिकाले जनाएको छ ।

शिविरबाट ५३ जनालाई राष्ट्रिय परिचयपत्र वितरण गरिएको छ । यस्तै, पाँच जनाको सामाजिक सुरक्षा भत्ता नयाँ दर्ता, १४० जनाको सामाजिक सुरक्षा भत्ता नवीकरण तथा १५ जनाको व्यक्तिगत घटना दर्तासम्बन्धी सेवा प्रदान गरिएको जनाइएको छ । शिविरका क्रममा विभिन्न सेवाबापत १९ हजार ८७८ रुपियाँ ४७ पैसा राजस्वसमेत सङ्कलन भएको सहकर्मी सोभित ढुंगेलले जानकारी दिनुभयो ।

गाउँपालिकाबाट टाढा रहेका तथा काठमाडौँ उपत्यकामा बसोबास गर्दै आएका नागरिकलाई गाउँमै पुगेर सेवा लिनुपर्ने बाध्यता कम गर्न शिविर प्रभावकारी भएको गाउँपालिकाले जनाएको छ । स्थानीय तहबाट प्रदान हुने सेवा नागरिकको बसोबास रहेको स्थान नजिकैबाट उपलब्ध गराउँदा समय र खर्चको बचत हुनुका साथै सेवाग्राहीलाई सहज भएको बताइएको छ ।