नेकपा एमाले लिखुपिके गाउँपालिकाको अध्यक्षमा बस्नेत सर्बतसम्म 

जेठ ३१, सोलुखुम्बु । नेकपा एमाले लिखुपिके गाउँपालिकाको पालिका अध्यक्षमा हिक्मत बस्नेत सर्बतसम्म निर्वाचित हुनुभएको छ । बुधबार सम्पन्न दोश्रो पालिका अधिवेशनबाट बस्नेत सर्बतसम्म अध्यक्ष पदमा निर्वाचित हुनु भएको हो । बुधबार सम्पन्न पालिका अधिवेशनले बस्नेतको अध्यक्षतामा ३९ सदस्यीय पालिका कमिटि समेत गठन गरेको नेकपा एमाले जिल्ला कार्य समिति सचिव कल्पना राईले बताउनुभयो ।

उहाँका अनुसार एमाले लिखुपिके गाउँपालिका उपाध्यक्षको जिम्मेवारी गेलु छिरि शेर्पालाई प्राप्त भएको छ । यस्तै सचिवमा तेज बहादुर बस्नेत, उपसचिव महिलामा प्रम कुमारी कार्की र अर्को उपसचिव पदको जिम्मेवारी चूल बहादुर कार्कीलाई प्राप्त भएको छ । निर्वाचित भएपछि रेडियो एभरेष्टलाई प्रतिकृया दिँदै अध्यक्ष बस्नेतले पार्टीको नीति विधी र विधानमा रहेर हितका लागी काम गर्ने बताउनुभएको छ ।

उहाँले संगठन विस्तार र सुदृढीकरणलाई तिब्रता दिँदै विकास निर्माणमा भुमिका खेल्ने गरी काम गर्ने बताउनुभएको छ । गत जेठ ५ गतेबाट पालिका अधिवेशन सुरु गरेको एमाले सोलुखुम्बुले हाल सम्म जिल्लाका सात वटा पालिकामा  सम्पन्न गरेको छ ।

जेठ मसान्त भित्रमा पालिका अधिवेशन सम्पन्न गर्नुपर्ने पार्टीको ह्वीप अनुसार जिल्लाका सात वटा पालिका अधिवेशन सम्पन्न भइसकेको र बाँकी खुम्बु पासाङ ल्हामु गाउँपालिकाको पालिका अधिवेशनका लागी अहिले तत्काल मिति तय भइनसकेको सचिव राईले बताउनुभयो । यसैवीच एमालेले वडा अधिवेशनलाई पनि तिब्रता दिएको छ ।

हाल सम्म नेचासल्यान गाउँपालिकाका ३ वटा वडामा अधिवेशन सम्पन्न भइसकेको छ । भने अन्य वडाको पनि हुने क्रम जारी रहेको उहाँको भनाई छ ।