बाढीपीडितका लागि ह्वाइट हिल्सका विद्यार्थी र शिक्षकले जुटाए ७५ हजार

भदौ २६, सोलुखुम्बु । भोटेकोशी नदीमा गत भदौ १० गते आएको बाढीबाट प्रभावित परिवारको सहयोगका लागि सोलुखुम्बुको सल्लेरीस्थित ह्वाइट हिल्स इङ्लिस बोर्डिङ स्कुलका विद्यार्थी तथा शिक्षकले राहत रकम सङ्कलन गरेका छन् । बाढीपीडितलाई सहयोग गर्ने उद्देश्यले विद्यालयका विद्यार्थी तथा शिक्षकबाट ७५ हजार रुपियाँ राहत रकम सङ्कलन गरिएको विद्यालयका प्रधानाध्यापक सन्तोष सुब्बाले जानकारी दिनुभयो ।

उहाँका अनुसार सङ्कलित रकम प्रधानमन्त्री दैवी प्रकोप उद्धार कोषमा जम्मा गरिनेछ । बाढीका कारण ठूलो जनधनको क्षति भएको अवस्थामा पीडित परिवारलाई सहयोग पुगोस् भन्ने उद्देश्यले विद्यालय परिवारले राहत सङ्कलन अभियान सञ्चालन गरेको उहाँले बताउनुभयो । विद्यार्थी तथा शिक्षकले आफ्नो क्षमताअनुसार स्वेच्छिक रूपमा सहयोग रकम उपलब्ध गराएका थिए । सङ्कलित रकम सम्बन्धित कोषमा जम्मा गरी बाढीपीडितको राहत तथा उद्धारमा सहयोग पुग्ने अपेक्षा गरिएको प्रधानाध्यापक सुब्बाले बताउनुभयो ।