सोलुखुम्बुमा कृषि कार्यक्रमको समीक्षा, कार्यक्रम कार्यान्वयनमा तीन तहबीच समन्वय आवश्यक

असोज २, सोलुखुम्बु । कृषि कार्यक्रम कार्यान्वयनमा संघ, प्रदेश र स्थानीय तहबीच समन्वय तथा सहकार्य आवश्यक रहेको सरोकारवालाले बताएका छन् । कृषि ज्ञान केन्द्र सोलुखुम्बुमा शुक्रबार राष्ट्रिय कृषि आधुनिकीकरण कार्यक्रम कार्यक्रम कार्यान्वयन एकाइ ओखलढुंगाको आयोजनामा सम्पन्न नीति तथा कार्यक्रम कार्यान्वयनका लागि समन्वय बैठक तथा कार्यक्रम सार्वजनिकीकरण कार्यक्रममा सहभागीले यस्तो बताएका हुन् ।

राष्ट्रिय कृषि आधुनिकीकरण कार्यक्रमको पहिलो चरण आर्थिक वर्ष २०८३/८४ देखि समाप्त हुने भएकाले परियोजनाअन्तर्गत हालसम्म सञ्चालन भएका कार्यक्रम तथा उपलब्धिको यथार्थ विवरण अद्यावधिक गरी कार्यक्रम कार्यान्वयन एकाइ ओखलढुंगालाई उपलब्ध गराउने निर्णय बैठकले गरेको छ । परियोजनाअन्तर्गत प्रदेशतर्फ कृषि ज्ञान केन्द्र, भेटेरिनरी अस्पताल तथा पशु सेवा विज्ञ केन्द्र र स्थानीय तहतर्फ कृषि तथा पशु विकास शाखामार्फत ब्लक तथा पकेट विकास कार्यक्रम सञ्चालन हुँदै आएका छन् । बैठकमा राष्ट्रिय कृषि आधुनिकीकरण कार्यक्रम कार्यक्रम कार्यान्वयन एकाइ ओखलढुंगाको चालु आर्थिक वर्ष २०८३/८४ को वार्षिक स्वीकृत कार्यक्रम सरोकारवाला निकायको सहभागितामा प्रस्तुत गरी सार्वजनिक गरिएको थियो ।

ओखलढुंगा र सोलुखुम्बु जिल्लामा सञ्चालित छ वटा जोन क्षेत्रअन्तर्गत बाख्रा जोन, आलु जोन, स्याउ–ओखर–किबी–सुन्तला जोन तथा अदुवा–बेसार जोनका साथै उद्यमशीलता कार्यक्रमका लागि प्रस्तावित अनुदानसम्बन्धी कार्यपत्र प्रस्तुत गरी छलफल गरिएको थियो ।संघ, प्रदेश र स्थानीय तहका कृषि तथा पशु विकास शाखाबाट सञ्चालन हुने कार्यक्रम तथा क्रियाकलापमा दोहोरोपना र डुप्लिकेसन हुन नदिन तीनै तहबीच आवश्यक समन्वय र सहकार्य गरेर कार्यक्रम सञ्चालन गर्ने निर्णयसमेत गरिएको छ । कार्यक्रममा जिल्ला समन्वय समिति सोलुखुम्बुका प्रमुख कृष्णप्रसाद निरौलाले कृषकलाई परम्परागत कृषिमा मात्र सीमित नराखी व्यावसायिक कृषितर्फ उन्मुख गराउनुपर्ने बताउनुभयो ।

उहाँले कृषि क्षेत्रबाट उत्पादन र आम्दानी बढाउन कृषकलाई आवश्यक सहयोग तथा प्रोत्साहनका कार्यक्रम प्रभावकारी रूपमा सञ्चालन गर्नुपर्नेमा जोड दिनुभयो । विभिन्न स्थानीय तहका कृषि शाखाबाट सहभागी प्रतिनिधिलाई कार्यक्रम सञ्चालनमा कुनै कन्जुस्याइँ नगरी कृषकको आवश्यकता र प्राथमिकताका आधारमा प्रभावकारी रूपमा काम गर्न उहाँले आग्रह गर्नुभयो ।

प्रमुख जिल्ला अधिकारी कमानसिं थापा मगरले नेपाललाई कृषि प्रधान देश भनिँदै आए पनि कृषि क्षेत्रले अपेक्षित उपलब्धि हासिल गर्न नसकेको बताउनुभयो । कृषि उत्पादनको बजार व्यवस्थापनलगायत विभिन्न कारणले कृषि क्षेत्रले अपेक्षित गति लिन नसकेको उल्लेख गर्दै उहाँले उत्पादनसँगै बजारीकरणमा समेत ध्यान दिनुपर्ने बताउनुभयो । राष्ट्रिय कृषि आधुनिकीकरण कार्यक्रम कार्यक्रम कार्यान्वयन एकाइ ओखलढुंगाका निमित्त वरिष्ठ कृषि अधिकृत हेमबहादुर आले मगरले कार्यालयले हालसम्म सञ्चालन गरेका कार्यक्रम तथा हासिल भएका उपलब्धिबारे जानकारी गराउनुभयो ।

कार्यक्रममा किबी जोन सञ्चालक समन्वय समितिका प्रतिनिधिले जिल्लाको आवश्यकता र सम्भावनाका आधारमा कार्यक्रम छनोट तथा सञ्चालन गर्नुपर्नेमा जोड दिनुभयो । उहाँले कृषकको वास्तविक आवश्यकता सम्बोधन गर्ने कार्यक्रमलाई प्राथमिकता दिनुपर्ने बताउनुभयो । कार्यक्रममा कृषि ज्ञान केन्द्र, स्थानीय तहका कृषि तथा पशु विकास शाखा, भेटेरिनरी अस्पताल तथा पशु सेवा विज्ञ केन्द्रलगायत सम्बन्धित सरोकारवाला निकायका प्रतिनिधिको सहभागिता रहेको थियो ।