असार लाग्यो, सुरू भयो सोलुमा धान रोपाइँ

असार ३, सोलुखुम्बु । सोलुखुम्बुको विभिन्न स्थानमा धान रोपाई सुरू भएको छ । यस वर्षको मनसुन सुरु भएसँगै एक हप्ता अघिदेखि जिल्लामा धान रोपाइँ सुरु भएको कृषि ज्ञान केन्द्रले जनाएको छ । केन्द्रका सूचना अधिकारी तथा बाली संरक्षण अधिकृत कुल बहादुर राईका अनुसार जिल्लाको नेचासल्यान गाउँपालिका, थुलुङदुधकोशी गाउँपालिका, सोताङ गाउँपालिका, लिखुपिके गाउँपालिकाको बेँसीका फाँटमा धान रोप्न सुरु गरिएको हो ।

यसबाहेक पनि जिल्लाका अधिकांश ठाउँमा धान रोपाइँको तयारी भइरहेको उहाँको भनाइ छ । जिल्लाका रोपाइँँ हुने क्षेत्रहरु नेचासल्यान, तिङला, जुबु, सोताङ, देउसा, पञ्चन, काँगेल, मुक्लि सहितका क्षेत्रहरुमा स्थानीय अतेमार्सी, दुधेमार्सी लगायतका धान खेती हुने गरेको जनाइएको छ । जेठ महिनामा पानी नपर्नाले धानको बीउ ब्याडमै डढ्ने र मर्ने हुँदा यसपाली बीउको अभाव हुने किसानको भनाइ छ । । जिल्लामा धान रोपाई हुने कुल क्षेत्रफल १ हजार ५ सय २५ हेक्टर मध्ये ७ सय ४ हेक्टरमा रोपाई सकिएको कृषि ज्ञान केन्द्र सोलुखुम्बुले जनाएको छ ।

जिल्लामा जेठको दोश्रो साताबाट सुरु भएको रोपाई साउनको तेश्रो साता सम्म चल्ने कृषि ज्ञान केन्द्र सोलुखुम्बुका बाली संरक्षक अधिकृत राईको भनाई छ । गत वर्षको तुलनामा यस वर्ष धान रोपाइँ छिटो सुरु भएको र पानी पर्याप्त भएमा चाँडै रोपाइँ सकिने केन्द्रले जनाएको छ । यतिबेला धान रोपाइँका लागि किसानहरु व्यस्त हुन थालेको बताइएको छ । कतिपय किसानको धानको बीउ छोटो भए पनि रोपाइँ सुरु गरेका छन् । पछिल्लो समय खेतमा काम गर्ने जनशक्ति नहुँदा किसानलाई समस्या पर्ने गरेको छ ।