सोलुखुम्बुमा मनसुनजन्य घटना :  एकै दिन १३ वटा बाढी पहिरोका घटना

असार १३, सोलुखुम्बु । पूर्वी जिल्ला सोलुखुम्बुमा एकै दिन १३ वटा मनसुन्जन्य घटना घटेको छ । मंगलबार रातिबाट निरन्तर परेको पानीले बुधबार जिल्लाको ५ वटा स्थानीय तहमा १३ वटा मनसुनजन्य घटना घटेको हो । सबै भन्दा बढी थुलुङ दुधकोशी गाउँपालिकामा ६ स्थानमा सडक तथा भौतिक संरचनामा क्षति पुगेको जिल्ला प्रहरी कार्यालय सोलुखुम्बुले जनाएको छ ।

जिल्ला प्रहरी कार्यालयका प्रमुख एवंम प्रहरी नायब उपरीक्षक द्वारीका प्रसाद घिमिरेका अनुसार थुलुङ दुधकोशी गाउँपालिका वडा नम्बर ८ स्थित मुक्लि जाने कच्ची सडक खण्डमा माथिबाट पहिरो आउदा सडक पुर्ण रुपमा अवरोध, सोहि पालिकाको वडा नम्बर ६ स्थित माझी गाउँका ७१ बर्षिय भीम बहादुर माझीको १ तले घर पहिराले आंशिक क्षति, ६ माझि गाउँ स्थित माझी समुदायको देवालय मान्दिरमा खोलाबाट आएको बाढी पस्दा सामान्य क्षति, वडा नम्बर ३ मैखुबेसी स्थित मैखु खोलामा आएको बाढीले जय कुमार राईको टिनको छानो भएको एक तले घरको भुइ तल्ला पुर्ण रुपमा क्षति र वडा नम्बर १ नेले स्थित जिवन ज्योती मावि नेलेको नवनिर्मित खेल मैदानको वाल भत्किएको हो ।

यस्तै माप्यदुधकोशी गाउँपालिका वडा नम्बर १ स्थित अधेरी खोला नजिकै रहेको सल्लेरी देखि थाम डाडाँ जाने भित्रि सडक खण्डमा माथिबाट पहिरो आउदा बाटो पुर्ण रुपमा अवरोध भएको थियो । यता सोलुदुधकुण्ड नगरपालिका वडा नम्बर २ बेनीमा कर्मा लामाको २ तले घर माथिबाट पहिरो आउदा भित्ता चर्केको र सोताङ गाउँपालिका वडा नम्बर ४ सुस्ता स्थित पञ्चकन्या आधाभूत विद्यालयको खेल मैदानको छेउको पर्खाल भत्किएको जिल्ला प्रहरी कार्यालय सोलुखुम्बुको तथ्याङकमा उल्लेख गरिएको छ ।

मनसुनजन्य घटनामा मानविय क्षति भने भएको छैन् । केही स्थानमा बुधबार पहिरो हटाउने कार्य भएको छ भने केही स्थानमा हटाउने प्रयास भइरहेको प्रहरी कार्यालयले जनाएको छ ।