असार १४, सोलुखुम्बु । सोलुखुम्बुको सोलुदुधकुण्ड नगरपालिका वडा नम्बर ७ स्थित गार्मा माध्यमिक विद्यालयका ३६ जना विद्यार्थीहरुले एनसिसि तालिम लिएसँगै विद्यार्थीहरु अनुशासित र लगनशील विद्यार्थी बन्ने भएका छन् । शुक्रबार विद्यालयमा एक कार्यक्रम आयोजना गरि बर्खे विदा पश्चात विद्यालयमा विद्यार्थीलाई तालिम लिने भएसँगै अनुशासित र लगनशील विद्यार्थी बन्ने भएका हुन् । विद्यालयमा अध्ययनरत ९ र १० कक्षाका १८ जना छात्र र १८ जना छात्रालाई तालिममा दिइने विद्यालयले जनाएको छ ।
सभ्य, अुनशासित र असल नागरिक उत्पादन गर्नु एनसीसी तालिमको मुख्य उद्देश्य रहेको रहेको बताइएको छ । नेपालमा नेपाली सेनाले सिनियर र जुनियर गरि दुईवटा डिभिजन छुट्याएर तालिम दिदै आएको दुर्गा बक्स गण सुरक्षा गुल्म सल्लेरीका सेनानी नवराज बस्नेतले बताउनुभयो ।
कार्यक्रममा प्रमुख अतिथीको आसनबाट बोल्दै प्रमुख जिल्ला अधिकारी देवि पाण्डे खत्रीले तालिमले विद्यार्थीहरुलाई अनुशासित, इमान्दार र लगनशिल बनाई राष्ट्र सेवामा लाग्नका लागि अभिप्रेरित गर्ने विश्वास व्यक्त गर्नुभयो । उहाँले तालिम अवधिभर लगनशिल भएर सहभागि हुन विद्यार्थीहरुलाई अनुरोध समेत गर्नुभएको छ ।
छात्र/छात्राहरुलाई अनुशासन,नेतृत्व विकास,बफादारिता र राष्ट्रिय एकता सम्बन्धि ज्ञान दिलाई मुलुकमा प्राकृतिक प्रकोपको अवस्थामा परिचालन हुन स्वयम्सेवक युवादस्ता तयार गर्न र राष्ट्र सेवाका लागि विभिन्न निकायमा जिम्मेवार रुपले कार्य गर्न सक्ने सक्षम नागरिक बनाउने लक्ष्यका साथ तालिम दिन लागिएको दुर्गा बक्स गण सुरक्षा गुल्म सल्लेरीका सेनानी नवराज बस्नेतको भनाई छ ।
नेपाली सेनाले राष्ट्रिय सेवा दल मार्फत २०२२ सालदेखि विद्यार्थीहरुलाई एनसिसी तालिम दिन सुरु गरेको हो । गार्मा माध्यमिक विद्यालयका विद्यालय व्यवस्थापन समितिका अध्यक्ष एवंम सोलुदुधकुण्ड नगरपालिका वडा नम्बर ७ का वडा अध्यक्ष सोनाम ग्याल्जे शेर्पाले आफ्नो विद्यालयमा पहिलो पटक विद्यार्थीहरुलाई एनसिसिको तालिम दिन पाउदा खुसी व्यक्त गर्नुभयो । विद्यार्थीहरुको व्यक्तित्व मात्र नभई अनुशासित समेत बनाउने अपेक्षा गर्नुभएको छ ।
यस तालिमका लागि जिल्लाबाट गार्मा मावि छनौट भएको भन्दै विद्यार्थीहरुले उत्साहजनक रुपमा तालिम लिन आग्रह गर्नुभएको छ । गार्मा माध्यमिक विद्यालयका प्रध्ययानध्यापक बिनोद सिंह तामाङले तालिममा विपद् व्यवस्थापन, सरसफाइ तथा वातावरण लगायतका विषयमा समेत जानकारी गराइने भएकाले इच्छा शक्तिका साथ तालिम लिन विद्यार्थीहरुलाई अनुरोध गर्नुभएको छ ।
आज एनसिसिको बारेमा वृस्तृत जानकारी गराउनका लागि आयोजना गरिएको कार्यक्रममा विद्यार्थीका अभिभावकहरुलाई समेत बोलाईए थियो । विद्यार्थीहरुलाई एनसिसि जुनियर तालिम दिन सुरु गरे पछि विद्यार्थीका अविभावकहरु समेत खुसी भएका छन् । तालिममा विद्यार्थीहरुलाई शारिरीक तालिम ,सैनिक ज्ञान,विपद ब्यावस्थापन, पर्शनालिटी डेभलपमेन्ट र साँस्कृतिक प्रतियोगीता सम्बन्धी ज्ञान दिईने भएको छ । उक्त तालिम १०० दिनको हुने भएको छ ।
