छुट्टै फिडरको व्यवस्था गरेर विद्युत दिनुपर्ने तिङ्लालीकाे माग, १ महिना भित्र माग पुरा नभए चरणबद्ध आन्दोलनको चेतावनी 

साउन ११, सोलुखुम्बु । सोलुखुम्बुको सोलुदुधकुण्ड नगरपालिका ११ तिङ्लामा छुट्टै फिडरको व्यवस्था गरेर लाइन वितरण गर्नुपर्ने माग गरिएको छ ।  आज नेपाल विद्युत प्राधिकरण सल्लेरी वितरण केन्द्रलाई ज्ञापन पत्र बुझाउदै तिङ्ला स्थित  तिन राजनैतिक दलका प्रमुखहरु सहितले ज्ञापन पत्र बुझाउदै यस्तो माग गरेका हुन ।

 कार्यालय प्रमुखका तर्फबाट जिवत्स शर्मालाई ज्ञापन पत्र बुझाउँदै माओवादी केन्द्रका वडा कमिटी अध्यक्ष ललित कुमार कार्की, नेकपा एमालेका अध्यक्ष कुमार कार्की र नेपाली कांग्रेसका वडा सभापति बालकुमार कार्की सहितको टोलीले कार्यालयमै पुगेर ज्ञापन पत्र बुझाउँदै १ महिना भित्र माग सम्बोधन गर्न अल्टिमेटम समेत दिनुभएको छ ।  

उहाँहरूले जिल्लामा जहाँसुकै विद्युत उत्पादन भएपनि तिङ्लामा जोडिने तर तिङलालीले त्यसको कुनै लाभ नपाएको भन्दै विभिन्न समयमा माग राख्दै आएको र अव पनि पुरा नभए चरणबद्ध आन्दोलन गर्ने चेतावनी दिएका छन ।  प्रभावित स्थल भएर पनि प्राधिकरणले वास्ता नगर्दा नागरिक मर्कामा परेको सोलुदुधकुण्ड नगरपालिकाका कार्यपालिका सदस्य निरकुमार नेपालीले बताउनुभयो । माग सुनेपछि ज्ञापन पत्र बुझ्दै कार्यालयका तर्फबाट शर्माले यथासम्भव माग सम्बोधन गरिने बताउनुभएकाे छ   ।