खोटाङका कम्प्युटर अपरेटर राई प्रधानमन्त्री ओलीको सदावहार रोजाइमा

साउन १५, सोलुखुम्बु । राजनीतिमा कोही कसैको स्थायी शत्रु वा मित्र नहुन सक्छ । तर प्रधानमन्त्री केपी शर्मा ओलीका लागि कम्प्युटर अपरेटर गणेश राई सदावहार रोजाइ हुने गरेका छन् । खोटाङ घर भएका गणेश राई अहिले चर्चामा छन् ।

पछिल्लो समय ओली प्रधानमन्त्री नियुक्त हुँदा उनी सिंहदरबारबाट बाहिरिइसकेका थिए । करारका कर्मचारी उनी असार मसान्तसँगै करार अवधि सकिएपछि सिंहदरबारबाट बाहिरिनु परेको थियो । तर प्रधानमन्त्री ओलीले उनलाई फेरि बोलाएर आफ्नो सचिवालयमा जागिर दिएका छन् ।

तेस्रो पटक प्रधानमन्त्री पदको शपथग्रहण गरेर सिंहदरबार जाँदा राई नभेटिएपछि ओलीले सोधखोज गरेका थिए । राईको करार सकिएको जानकारी पाएपछि ओलीले तत्कालै उनलाई फेरि सरकारी सेवामा जोडेका हुन् । खोटाङको जन्तेढुङ्गा गाउँपालिकाका गणेश राईले ओलीसँग पहिलो पटक २०७२ मा बालकोटमा भेट गरेका थिए ।

सो समय उनी स्वर्गीय मिलन राईमार्फत अध्ययन अगाडि बढाउने भनेर काठमाडौँ आएका थिए । तर, राई प्रधानमन्त्री कार्यलयबाट बाहिरिनुको कथा भने प्रचार गरिएकोभन्दा भिन्न छ । करारका कर्मचारी उनको असार मसान्तमा अवधि सकिएको थियो । त्यसैले उनी बाहिरिएका थिए ।

बाहिरिएको ७ दिनमै ओलीका कारण उनी फेरि सचिवालयमा भित्रिए । असार मसान्तमा करार सकिएर उनीसँगै ९ कर्मचारी बाहिरिएका थिए । जसमध्ये उनीसहित ४ जनालाई प्रधानमन्त्री ओलीले फर्काइसकेका छन् भने बाँकी ५ जनालाई पनि फर्काउन निर्देशन भइसकेको राईले बताए ।