सोलुखुम्बुमै पहिलो पटक सोताङमा खुट्टा काटेर शल्यक्रिया 

साउन १७, सोलुखुम्बु ।  सोलुखुम्बु जिल्लामै पहिलो पटक ग्याङरिन ( खुट्टा कुहिने ) समस्याको सफल शल्यक्रिया गरिएको छ । जिल्लाको सोताङ गाउँपालिका स्थित सोताङ प्राथमिक स्वास्थ्य केन्द्रमा जिल्लामै पहिलो  पटक खुट्टा कुहिने रोगको सफल शल्यक्रिया गरिएको हो ।  गाउँपालिकाको वडा नम्बर ५ का ८५ वर्षिइ सेर बहादुर बस्नेतको खुट्टा विगत ५ महिना देखी कुहिन थालेको थियो । विस्तारै उनको खुट्टा कुहिदै काट्नु पर्ने अवस्था सम्म पुगेपनि उपचारमा अन्यत्र जान सक्ने अवस्था थिएन । तर केहीलिदन मात्रै सोताङ गाउँपालिकाले गाउँपालिकामै हाडजोर्नी सम्बन्धी उपकरण थप गरेपछि बस्नेतको घुँडा भन्दा मुनिको भाग काटेर फालिएको छ ।  

ग्याङरिनबाट समस्या ग्रस्त बनेका बस्नेतको बुधबार विलो नि एपुटेसन फर ड्राइ ग्याङरिन अपरेसन गरिएको सोताङ प्राथमिक अस्पतालका मेडिकल सुपरिटेन्डेन्ट डा बिकेश श्रेष्ठले बताउनुभयो । बस्नेतको अन्यत्र जाँदा करिव २ लाख लाग्ने समस्या को सफल शल्यक्रिया अस्पतालमा  २ देखी ५ हजारमा समाधान भएको छ ।  अस्पतालले हाडजोर्नी सम्बन्धी स्टिल लगाउने लगायतका अन्य शल्यक्रियाहरू ५ जनाको गरिसकेको छ ।  

तर खुट्टानै काट्नुपर्ने जस्तो गम्भीर रोगको उपचार भने जिल्लामै पहिलो पटक भएको डाक्टर श्रेष्ठको दावी छ । अस्पतालमा प्रसूति, ओपिडी, ल्याब टेस्ट, थाइराइड, भिटामिन डि टेस्ट लगायतका सेवाहरु दिइदै आएको छ । भने इमर्जेन्सी कक्ष बनाएर आकस्मिक र जटिल खालका समस्याहरूको पनि उपचार हुँदै आएको छ  । यसैविच सोताङ गाउँपालिकाले अस्पतालको स्तरोन्नति गर्दै लैजाने क्रमलाई निरन्तरता दिएको छ ।  भरखरै मात्र गाउँपालिका अध्यक्ष खिलराज बस्नेतको पहलमा अस्पताललाई करिव २१ लाख बराबरको स्वास्थ्य उपकरणहरू प्राप्त भएको अस्पतालले जनाएको छ ।  पछिल्लो समय अस्पतालमा भिडियो एक्सरे मेसिन, विभिन्न खाले ल्यावटेस्टका मेसिन, युएसजि मेसिन लगायत विभिन्न खाले स्वास्थ्य उपकरणहरू आएको डाक्टर श्रेष्ठको भनाई छ ।