सोलुखुम्बुमा कण्डमको माग उच्च, एक वर्षमा ८० हजार ओटा खपत

साउन १७, सोलुखुम्बु । हिमाली जिल्ला सोलुखुम्बुमा एक वर्षमा ८० हजार ओटा कण्डम खपत भएको छ ।  जिल्ला भर एक वर्षमा ८० हजार अस्थायी परिवार नियोजन को साधन कण्डम खपत भएको स्वास्थ्य कार्यालय सोलुखुम्बुले जनाएको छ ।

 स्वास्थ्य तथा जनसङ्ख्या मन्त्रालय बाट आएको विभिन्न खालका परिवार नियोजनका साधनमध्ये ८० हजार ओटा करिव कण्डम मात्रै खपत भएको स्वास्थ्य कार्यालय सोलुखुम्बुले जनाएको छ  ।  ८ ओटा पालिका रहेको जिल्लामा प्रति पालिका करिव १० हजार थानको दरले कण्डम खपत भएको हो ।

यस्तै अस्थायी परिवार नियोजनका साधनहरू मध्ये डिपो अर्थात ३ महिने सुई जिल्ला भर ८ हजार भाइल खपत भएको छ ।  एक पटक लगाएपछि ३ महिना ढुक्क हुने यो सुई कण्डमको तुलनामा कम खपत भएको छ  ।

यस्तै जिल्ला भर पिल्स १२ सय साइकलका दरले ८ हजार ४ सय साइकल, इम्प्लान्ट र आइयुसिडी ४/४ सय ओटा खपत भएको कार्यालयका सूचना अधिकारी राम नारायण शाहले बताउनुभयो । जिल्लाभरका हरेक स्वास्थ्य संस्थामा यस्ता परिवार नियोजनका साधन उपलब्ध हुने तरिकाले व्यवस्थापन गरिएको जनाइएको छ ।