ज्येष्ठ नागरिकमाथि राज्यको ‘अत्याचार’

साउन २१, सोलुखुम्बु । विराटनगरको चर्को घाम सहँदै राष्ट्रिय परिचयपत्र बनाउनकै लागि जिल्ला प्रशासन कार्यालय मोरङमा ज्येष्ठ नागरिकहरूको भिडभाड छ । कोही स–साना बुट्यानको छहारीमा छन् । कोही पसिना बगाउँदै लाइनमा सकी–नसकी बसेका छन् ।

कोही जिल्ला प्रशासन कार्यालयका प्रमुख जिल्ला अधिकारी र सहायक प्रमुख जिल्ला अधिकारीका कार्यकक्षमा लौरो टेकेर पुगेका छन् । त्यही भिडमा राष्ट्रिय परिचयपत्र बनाउन पुगेकी सुन्दरहरैंचा १ की ८४ वर्षीय लक्ष्मी ढकाल पनि सानो बुट्यानको छहारीमा बसिरहेकी छन् ।

बढ्दो उमेर, आँखा नदेख्ने, कान नसुन्ने, दमकी रोगी ढकाललाई पनि वडाका जनप्रतिनिधिहरूले राष्ट्रिय परिचयपत्र नबनाए ज्येष्ठ नागरिक कार्ड नवीकरण नहुने भनेर सुनाए । त्यो नवीकरण नहुँदा वृद्ध भत्ता नपाउने उनमा डर थियो ।

त्यसपछि उनले राष्ट्रिय परिचयपत्रकै लागि वडा कार्यालयमा दुई पटक फोटो खिचाइन् । तर, नम्बर आएन । त्यही नम्बर मिलाउन उनी जिल्ला प्रशासन कार्यालय मोरङ आइपुगिन् । ढकाल देवरको घरमा बस्छिन् । वृद्ध भत्ताकै भरमा उनको जीवन चलेको छ ।