आफ्नो गाउँ आँफै बनाउमा जुटे उदयपुर रुपाटारका युवाहरु

साउन २१, सोलुखुम्बु । आफ्नो गाउँ आँफै बनाउमा यहाँका युवाहरु सक्रिय भएको छन् । उदयपुरको ताप्ली गाउँपालिका वडा नम्बर ५ रुपाटारका युवाहरु गाउँ बनाउँ अभियानमा जुटेका हुन् । युवाहरुको सक्रियतामा यहाँ रहेको खाली जमिनमा वृक्षारोपण गरिएको छ ।

आफ्नो गाउँ समाज निर्माणका अरुको मुख ताक्नुभन्दा स्थानीय नै जुट्नुपर्छ भन्ने ज्ञान युवाहरुले दिएका छन् । सोमबार रुपाटारको रातमाटे, लाभडाँडा, कुमालखाडी र हाडेचौरको खाली क्षेत्रमा खयर,गोल्मर,जामुन, मौवा, टिक, चाईनिज सखुवा लगायतका २ हजार बोट हाराहारीमा बिरुवाहरु रोपिएको सक्रिय युवा अगुवाई सत्येन्द्र राईले जानकारी दिनुभयो ।

स्थानीय सरकारले वन तथा वातावरण संरक्षणमा नीति तथा बजेट बारे कुनै पनि चासो, चिन्ता नलिएको र व्यवस्थापनमा वेवास्ता गरेको भन्दै युवाहरु नै लागि परेको राईको भनाई छ । वृक्षारोपणका लागि डिभिजन वन कार्यालय कटारीबाट २ सय २० गाछी र अन्य ठाउँबाट गरी जम्मा २ हजार बिरुवा संकलन गरिएको संवाददाता ठविन्द्र मगरले जानकारी दिनुभयो ।

बिरुवाहरु कटारीदेखि रुपाटारसम्म ढुवानी, रोप्नको लागि खाडल खन्न, बिरुवा रोपण र रोपिएको बिरुवालाई संरक्षण गर्न बाँसको टोकरी निर्माण देखि घेराबार समेत युवाहरु आफैले चन्दा संकलन गरेर व्यवस्थापन गरेको बताईएको छ । युवाहरुले सार्वजनिक जग्गामा मात्र नभई महेन्द्र रत्न मावि रुपाटारको नाममा रहेको १४ रोपनी नम्बरी जग्गामा समेत १ हजार ५ सय गाछी बोटबिरुवा रोपेका छन् ।

यो वर्ष रोपिएको बिरुवाहरुको सिँचाई देखि लिएर संरक्षणको लागि बजेट र बिभिन्न औजार सामाग्रीहरुको आवश्यकता रहेको कारण, यसलाई व्यवस्थापन गर्न सम्पूर्ण तप्ली बासीको उत्तिकै महत्वपूर्ण भूमिका रहने भएकाले ताप्ली सरकारले बजेट व्यावस्थापन गरि युवाहरुलाई यस्तै सामाजिक कार्यमा अग्रसर हुन प्रेरित गर्ने किसिमको योजना तथा कार्यक्रम निर्माण गर्न समेत आग्रह गरेका छन् ।