रमिते— नेचासल्यान कृषि सडक कालोपत्रेका लागी सर्भे, १ महिना भित्र काम सुरु हुने  

भाद्र ५, सोलुखुम्बु ।  सोलुखुम्बुको तिङ्ला रमितेबाट नेचासल्यान गाउँपालिका जाने सडक कालोपत्रेका लागी सर्भे गरिएको छ । सोलुदुधकुण्ड नगरपालिका ११ तिङ्ला रमितेबाट सिंहकाली मावि, कुइभीर हुदै नेचासल्यान जाने सडक  कालोपत्रेका लागी पहिलो चरणको सर्भे मंगलबार सम्पन्न भएको हो ।

सोलुदुधकुण्ड नगरपालिकाका नगरप्रमुख नाम्गेल जाङ्बु शेर्पा सहित इन्जिनियरहरूको टोली पुगेर उक्त सडक खण्ड कालोपत्रेका लागी सर्भे गरेको जनाइएको छ ।  अहिले पहिलो चरणमा रमिते जेरो प्वाइन्टबाट सिंहकाली मावि सम्मको २ दशमलव ५ किलोमिटर सडक कालोपत्रेका लागी मंगलबार सर्भे गरिएको नगरपालिकाका कार्यपालिका सदस्य निर कुमार नेपालीले बताउनुभयो ।   उक्त सडक कालोपत्रेका लागी सडक विभाग ओखलढुङ्गाबाट २ करोड १५ लाख रुपैयाँ बजेट विनियोजन गराइएको मेयर शेर्पाको भनाई  छ ।  

प्राथमिकताको आधारमा योजना छनौट गर्दा तिङला रमिते नेचासल्यान कृषि सडक कालोपत्रेका लागी योजना पठाइएको र अहिले उक्त सडक कालोपत्रेको लागी योजना परिसकेकाले अव चाँडै टेन्डर प्रकृयामा जाने मेयर शेर्पाको भनाई छ ।  दशै अगाढी टेन्डर प्रकृया सम्पन्न गरि काम सुरु गराउने आफुहरुको योजना रहेको उहाँले सुनाउनुभयो ।

यस्तै नगरपालिका भित्रकै फाप्लु टाक्सीन्धु सडक स्तरोन्नतिका लागी पनि स्टिमेटको काम सम्पन्न भएको मेयर शेर्पाको भनाई छ  । बुधबार नगरपालिकाको वडा नम्बर १ टाक्सीन्धु अन्तर्गत रिङमुबाट छिर्कुघाट सम्मका सडक स्तरोन्नतिका लागी पनि इस्टमेट भएको उहाँको भनाई छ ।  उक्त सडक स्तरोन्नतिका लागी पनि सडक विभागको २ करोड २५ लाख रुपैयाँ बजेट विनियोजन भइसकेको छ भने १ महिना भित्र टेन्डर प्रकृयामा गइसक्ने मेयर शेर्पाले बताउनुभयो ।