गट्ठाघर दुर्घटना ट्रकचालकको लापर्बाहीले भएको निष्कर्ष

भदौ ६, सोलुखुम्बु । भक्तपुरको गट्ठाघरमा साउन ३१ गते भएको दुर्घटना ट्रकचालकको लापर्बाहीका कारण भएको निष्कर्ष निकालिएको छ । ट्रकले स्कुटरलाई ठक्कर दिएको उक्त घटनाबारे छानबिन समितिले यस्तो निष्कर्ष निकालेको हो ।

बा ४९ प ८९४४ नम्बरको स्कुटरलाई ना ६ ख २१७३ नम्बरको ट्रकले ठक्कर दिँदा ओखलढुङ्गाको चिसङ्खुगढी–४ का उत्तम कोइरालाको घटनास्थलमा नै ज्यान गएको थियो । प्रहरी उपरीक्षक प्रजित केसी नेतृत्वको छानबिन समितिले सो दुर्घटनाबारे तयार पारेको प्रतिवेदन मङ्गलबार उपत्यका प्रहरी कार्यालयका प्रमुख, प्रहरी अतिरिक्त महानिरीक्षक (एआइजी) किरण वज्राचार्यलाई बुझाएको छ । वज्राचार्यले ट्रकचालकको गम्भीर लापर्बाहीका कारण दुर्घटना भएको निष्कर्ष प्रतिवेदनमा उल्लेख गरिएको जानकारी दिएका छन् ।

समितिले दुर्घटनास्थलको सिसिटिभी फुटेज, प्रत्यक्षदर्शीको बयान तथा घटनास्थलमा तैनाथ ट्राफिक प्रहरीसँग सोधपुछलगायत प्राविधिक विषयमा छानबिन गरेको थियो । छानबिन समितिसँगको बयानमा स्कुटरलाई ठक्कर दिने ट्रकचालक सर्लाहीका सतेन्द्र श्रेष्ठले स्कुटरलाई आफूले नदेखेको र एक्कासि ट्रकमा ठोक्किएको आवाज आएपछि रोकेर हेर्दा मात्र दुर्घटना भएको देखिएको बयान दिएको बताइएको छ ।

घटनास्थलको सिसिटिभी फुटेजमा स्कुटरसहित चालकलाई ट्रकले केही मिटर लछारेको देखिएको छ । एआइजी वज्राचार्यले घटनास्थलको छानबिन गर्दा कम्तीमा ३० मिटरको दुरीमा ट्राफिक प्रहरीले गति सीमित चेकजाँच गरेको र उक्त चेकजाँचभन्दा अघि दुर्घटना भएकाले ट्राफिक प्रहरीको कमजोरी नदेखिएको बताएका छन् ।