स्थानीय तह स्वमूल्याङ्कनमा साेलुखुम्बुकाे नेचासल्यान गाउँपालिका जिल्ला प्रथम, कस्काे कती अंक पढ्नुस समाचारमा….

भदौ ८, सोलुखुम्बु  । स्थानीय तह संस्थागत क्षमता स्व मूल्याङकनमा सोलुखुम्बुको नेचासल्यान गाउँपालिका जिल्लामै प्रथम भएको छ ।  संघीय मामिला तथा सामान्य प्रशासन मन्त्रालयले विहीबार आर्थिक वर्ष २०७९/८० अन्तर्गत सार्वजनिक गरेको स्व मुल्याङ्कनमा सोलुखुम्बुको नेचासल्यान गाउँपालिका ७९ दशमलव ७५ अङ्क प्राप्त गर्दै   जिल्लामै प्रथम  पालिका भएको हो ।

यस्तै स्वमूल्याङकनमा जिल्लाको एकमात्र नगरपालिका सोलुदुधकुण्ड नगरपालिका दोश्रो भएको छ ।  नगरपालिका ७८ दशमलव २५ अङ्क प्राप्त गर्दै दोश्रो भएको हो । यस्तै हिमालको काखमा रहेको खुम्बु पासाङल्हामु गाउँपालिका स्व मुल्याङ्कनमा ७५ अङ्क ल्याएर तेश्रो भएको छ ।  

यस्तै थुलुङ दुधकोशी गाउँपालिका ६६ दशमलव २५ अङ्क प्राप्त गर्दै चौथो भएको छ । यता महाकुलुङ गाउँपालिका ५४ दशमलव ५४ अङ्क प्राप्त गर्दै पाचौँ, माप्य दुधकोशी गाउँपालिका ४२ दशमलव ५० अङ्क प्राप्त गर्दै छैटौँ, लिखुपिके गाउँपालिका ३३ दशमलव ७५ अङ्क प्राप्त सातौँ र   सोताङ गाउँपालिका २७ दशमलव २५ अङ्क प्राप्त गर्दै आठौँ स्थानमा रहेका छन् ।  

मन्त्रालयले स्थानीय तहमा जवाफदेहिता, पारदर्शिता र प्रतिस्पर्धा प्रवर्द्धन गर्दै सुशासन कायम गर्ने उद्देश्यले शासकीय प्रबन्ध, सङ्गठन तथा प्रशासन, बजेट तथा योजना तर्जुमा व्यवस्थापन, वित्तीय एवम् आर्थिक व्यवस्थापन, सेवा प्रवाह, न्यायिक कार्यसम्पादन, भौतिक पूर्वाधार, सामाजिक समावेशीकरण, वातावरण संरक्षण तथा विपद व्यवस्थापन तथा सहकार्य र समन्वयमा विभिन्न सूचक राखेर अङ्कभार निर्धारण गरेको छ । स्थानीय तहले गरेको स्व मूल्यांकनलाई जाँच गर्ने जिम्मेवारी जिल्ला समन्वय समितिलाई हुन्छ।  त्यसपछि मन्त्रालयले गुणस्तर परीक्षण गर्ने गरेको छ ।