सोलुखुम्बुका शेर्पा टानको वरिष्ठ उपाध्यक्षका उम्मेदवार

भदौ ९, सोलुखुम्बु । पदयात्रा (ट्रेकिङ) व्यवसायीहरुको छाता संस्था ट्रेकिङ एजेन्सीज् एशोसियशन अफ नेपाल (टान)को वरिष्ठ उपाध्यक्षमा कर्मा शेर्पाले उम्मेदवारी दिनुभएको छ । सोलुखुम्बु जिल्लाको सोलु दुधकुण्ड नगरपालिका वडा नं १ टाक्ससिन्धु विस २०३९ मा जन्मनुभएका शेर्पाले भदौ १७ गते हुन लागेको टानको निर्वाचनमा वरिष्ठ उपाध्यक्षको उम्मेदवारी दिनुभएको हो ।

विश्वको सर्वोच्च शिखर सगरमाथासँगै रहेको नुम्बुर हिमालको काखमा जन्मनुभएका शेर्पा विगत दुई दशकदेखि नेपालको पर्वतीय पर्यटन क्षेत्रमा क्रियाशिल हुनुहुन्छ । दाईहरुको संगतले पर्यटन व्यवसायमा लाग्नुभएका शेर्पा नोमेड नेपाल टे«क्स एण्ड एक्पीडिसनका सञ्चालकसमेत हुनुहुन्छ । उक्त कम्पनी २५ वर्ष पुरानो हो । सन् २०११ देखि २०१३ मा टानको कार्यसमितिमा सदस्य भएर नेपालको पर्वतीय पर्यटनको विकासका क्षेत्रमा काम गर्नुभएका शेर्पा सन् २०१९ देखि २०२१ को निर्वाचनमा भने १२ मतले महासचिवमा पराजित हुनुभएको थियो ।

उहाँले ट्रेकिङसँगै हस्पिटालिटी क्षेत्रलाई समेत अगाडि बढाउँदै आउनुभएको छ । उहाँ हाल काठमाडौँ हाइट वुटिक होटल चावहिलको सञ्चालक हुनुहुन्छ ।पेशासँगै सामाजिक सेवामा समेत उत्तिकै क्रियाशिल शेर्पाले सोलुखुम्बुमा वाइड हिल्स स्कुलसमेत सञ्चालनमा ल्याउनुभएको छ । उक्त स्कुलमा पर्वतीय पदयात्राको क्रममा निधन भएका श्रमिकका परिवारलाई निःशुल्क अध्यापन गराउँदै आउनुभएको छ ।

यस्तै, उहाँले सोलुखुम्बुको सोलु क्षेत्रमा खानेपानी, दर्जनौभन्दा बढी स्कूलका विद्यार्थीलाई स्टेशनरी सहयोग, भूकम्पपछि क्षति पुगेका घरको पुननिर्माण, महिलालाई शिक्षा प्रदानलगायतका सामाजिक काम गर्दै आउनुभएको छ । शेर्पाले ट्रेकिङमात्र नभई उहाँले स्पोर्टस एडभेन्चरलाई समेत प्रवद्र्धन गर्दै आउनुभएको छ । लामो समयदेखि नेपालको पदयात्रा पर्यटनमा क्रियाशिल शेर्पाले आफू निर्वाचित भएमा टानलाई गतिशिल र पर्यटन क्षेत्रलाई मर्यादित बनाउने योजना राख्नुभएको छ ।

यस्तै, उहाँले टानलाई पर्यटन क्षेत्रको लिडिङ संस्थाको रुपमा विकास गराउने, व्यवसायीको अपनत्व हुने गरी संस्थागत रुपमा टानलाई अगाडि बढाउने योजना समेत रहेको बताउनुभयो । पदयात्रा व्यवसायीलाई राज्यसँग जोड्नका लागि टानमा गएर आफूले पुलको काम गर्ने योजना उहाँसँग रहेको छ । यसबाहेक टानलाई प्रविधिसँग जोडेर डिजिटल टान निर्माण गर्ने उहाँले बताउनुभयो ।