रामेछाप पहिरोमा परी मृत्यु हुने र बेपत्ताको पहिचान खुल्यो

भदौ ९, सोलुखुम्बु । रामेछापको दोरम्बा शैलुङ गाउँपालिका–३ टोकरपुरको लेखर्कमा गएरराति आएको पहिरोमा परि ज्यान गुमाउने र बेपत्ता हुनेको पहिचान खुलेको छ। पहिरोमा परी ३२ वर्षकी चण्डिका थापा मगर र उनका अन्दाजी दुई वर्षका छोरा आमुस मगरको ज्यान गएको छ।

चण्डिकासँगै सो घरमा रहेकी अञ्जना पहरीको भने जीवितै उद्धार गरिएको छ। पहिरोले स्थानीयका चारवटा घर बगाएको छ भने पहिरोको कारण पुरै बस्ती जोखिममा छ। हिरोले घर बगाउँदा ९० वर्षकी पुड्की पहरी, ४५ वर्षीय उर्मिला पहरी, १५ वर्षका सन्तोष पहरी, १६ वर्षका विज्ञान पहरी, १५ वर्षका सन्दीप पहरी बेपत्ता भएका छन्। त्यस्तै करिब ५५ वर्षका काले पहरी, ५० वर्षकी झ्याउँकिरी पहरी र २० वर्षकी विनीता पहरी पनि बेपत्ता भएको घटनास्थलमा उद्धार कार्यमा संलग्न नवीन पाठकले जानकारी दिए।

यसै गरी पहिरोमा पुरिएर गोमा पहरीको घरमा रहेका ३ वटा भैँसी र १० वटा बाख्रा, उर्मिला पहरीका एउटा भैँसी, तीनवटा गाई र १८ वटा बाख्रा तथा कर्णबहादुर पहरीको एउटा बाख्रो पनि बेपत्ता भएका छन्। बाढी पहिरोले दुईवटा पक्की पुलमा क्षति गरेको छ। गाउँसम्म जाने बाटो पहिरोले क्षति क्षत विक्षत भएको छ। घटनास्थलमा बिहान सबेरैदेखि प्रहरी, तथा स्थानीयले खोज उद्धार गरिरहेका छन्।