सोलुखुम्बुमा बेवारिसे फेला परेको शवको पहिचान खुल्यो

भदौ ९, सोलुखुम्बु । सोलुखुम्बुको माप्यदुधकोशी गाउँपालिका वडा नम्बर १ जुभिङमा फेला परेको बेवारिसे शवको पहिचान खुलेको छ । शनिबार गत साउन ३१ गते मृत अवस्थामा भेटिएका व्यक्ति ओखलढुंगाको सुनकोशी गाउँपालिका ५ मुलखर्क बस्ने दुधबहादुर तामाङको छोरा ५८ वर्षीयका राम बहादुर तामाङको भएको खुल्न आएको हो ।

उक्त शवको मृतकको सहोदर भाइ ५५ वर्षीय लाल बहादुर तामाङले सनाखत गरी कानूनी प्रकृया पुरा गरेर लाश जिम्मा लिएको जिल्ला प्र्रहरी कार्यालय सोलुखुम्बुका प्रहरी निरीक्षक तथा सूचना अधिकारी लक्ष्मण गिरीले जानकारी दिनुभयो ।

उहाँका अनुसार साउन ३१ गते अनुमानित १२ः४० बजेको समयमा जुभिङमा उचाई ५.३ इन्च भएको, मध्यम शरिर, गहुगोरो वर्णको, दारी फुलेको, अन्दाजी ६५/७० वर्षको जस्तो देखिने बाया गालामा फोका निस्केको, कपाल फुलेको, सेतो सर्ट, कालो हाफपाइन्ट, सेतो कालो टोपी लगाएको सुपारी बाजे भनी चिनिने बृद्धा मृत अवस्थामा फेला परेका थिए ।