रक्षामन्त्री राईद्वारा महाकुलुङ गाउँपालिकाको प्रशासनिक घुम्ती शिविर उद्घाटन

भदाै १०, साेलुखुम्बु ।   सोलुखुम्बु जिल्लाको महाकुलुङ गाउँपालिकाले काठमाडौंमा योजना गरेको २ दिने प्रशासनिक घुम्ती शिविरको उद्घाटन रक्षा मन्त्री मानवीर राईले गर्नुभएकाे छ । उहाँले गाउँपालिका तथा स्थानीयबाट महाकुलुङ क्षेत्रलाई राष्ट्रिय निकुञ्जको रुपमा घोषणा गर्न आफुले समन्वय गर्ने बताउनु भएकाे छ ।

स्थानीयकाे माग आएका कारण त्यसका लागि आफुले मन्त्रालयसंग समन्वय गर्ने बताउनु भएकाे हाे ।

कार्यक्रमलाई सम्बोधन गर्दै कोशी प्रदेशसभा सदस्य गोम्बु शेर्पाले बार्षिक रुपमा महाकुलुङ गाउँपालिकाले काठ्माडौंमा रहेका महाकुलुङबासीलाई लक्षित गरी संचालन गर्दै आएको घुम्ति शिविरले प्रभावकारी उपलब्धि हासिल गरेको भन्दै आगामी दिनमा पनि यसले निरन्तरता पाउनुपर्ने बताउनु भएकाे छ ।

उहाँलेे महाकुलुङलाई राष्ट्रिय निकुञ्जको रुपमा विकास गर्ने माग उठी रहँदा यसले भविष्यमा समस्या ल्याउन सक्ने भन्दै तत्काल राष्ट्रिय निकुञ्ज घोषणा गर्ने कुरालाई स्थगीत गरी गाउँपालिका अन्तर्गत नै विकासका योजना बनाउनु पर्ने आवश्यक रहेकाे विचार व्यक्त गर्नु भयाे ।

यसैबीच, महाकुलुङ गाउँपालिका वडा नं. ४ ले स्थानीय भत्ता प्रयोजनको लागि वर्गिकृत जिल्ला अन्तर्गत वडा नं. ४ साविक गुदेल गाविस अझ बढी दुर्गम रहेता पनि सुगम वडाको रुपमा सुचिकृत रहँदा सो क्षेत्रमा कार्यरत शिक्षकहरुलाई हालसम्म स्थानिय भत्ता उपलब्ध नगराईएको भन्दै रक्षा मन्त्री समक्ष ध्यानाकर्षण पत्र बुझाएको छ ।

वडा नं. ४ का वडा अध्यक्ष सरस्वती राईको नेतृत्वमा गएको टोलिले रक्षा मन्त्री मानबीर राई मार्फत शिक्षा, विज्ञान तथा प्रविधि मन्त्रालय तथा अर्थ मन्त्रालयसँग सहजीकरणका लागि आग्रह गरेको हो ।