पहिरोले अवरुद्ध दिक्तेल–हलेसी सडक एकतर्फी सञ्चालनमा

भदौ ११, सोलुखुम्बु । पहिरोले अवरुद्ध भएको मध्यपहाडी लोकमार्गअन्तर्गत दिक्तेल–हलेसी सडक एक तर्फी सञ्चालनमा आएको छ । खोटाङको हलेसी तुवाचुङ नगरपालिका–१० अर्खौलेस्थित नागी नजिक करिब ५० मिटर सडकमा आज बिहान पहिरोले अवरुद्ध भएको सडक एकतर्फी सञ्चालनमा आएको हो ।

दुईतर्फी सडक सञ्चालन गर्न पहिरो पन्छाउने काम भइरहेको जिल्ला प्रहरी कार्यालय खोटाङका प्रहरी प्रमुख एवंम प्रहरी नायव उपरीक्षक पुरुषोत्तम खड्काले जानकारी दिनुभयो । तुवाचुङबाट झरेको पहिरोले करिब ५० मिटरभन्दा लामो सडकखण्ड ओगटेको थियो ।

पहिरोले सडक अवरुद्ध भएपछि राजधानी काठमाडौँलगायत पूर्वी तराईका विभिन्न जिल्ला जाने यात्रु बाटोमै अलपत्र परेका थिए भने अहिले गन्तब्य तर्फ लागेका छन् । तुवाचुङबाट झरेको पहिरोसँगै ठूल्ठूला रुख र ढुङ्गा सडकमा थुप्रिएका थिए । उक्त स्थानमा विगत वर्षमा पनि पटक पटक पहिरो जाने गरेको थियो ।

उक्त क्षेत्रमा कमेरो माटो भएकाले पहिरो निरन्तर जाने गरेको स्थानीय बासिन्दाले बताएका छन् ।