जिल्ला अस्पताल सोलुखुम्बुमै सुरु भयो दन्त उपचार सेवा 

भदौ १८, सोलुखुम्बु  । जिल्ला अस्पताल फाप्लु सोलुखुम्बुमा दन्त सेवा सुरु भएको छ ।  मङ्गलबार जिल्ला समन्वय समिति सोलुखुम्बुका प्रमुख एवं जिल्ला अस्पताल फाप्लुका अस्पताल व्यवस्थापन समिति अध्यक्ष कृष्ण प्रसाद निरौलाको प्रमुख आतिथ्यतामा जिल्ला अस्पताल फाप्लुमा दन्तसेवा सुरु भएको हो ।

 एक औपचारिक कार्यक्रमका बीच समन्वय प्रमुख निरौला तथा सोलुदुधकुण्ड नगरपालिका वडा नम्बर ४ फाप्लुका वडा अध्यक्ष युवास तामाङले संयुक्त रुपमा उद्‌घाटन गर्दै दन्त सेवा सुरु भएको घोषणा गर्नुभएको छ ।   प्रदेश सरकार तथा अस्पताल विकास कोषको लागतमा अस्पतालमा दन्त विभाग स्थापना गरि सञ्चालनमा ल्याइएको अस्पतालका निमित्त प्रमुख डाक्टर प्रशान्त शाहले बताउनुभयो । प्रदेश र अस्पतालको करिव १० लाख रुपैयाँ लागतमा मेसिन तथा औजार उपकरण खरिद गरि दन्त चिकित्सकको व्यवस्था सहित दन्त सेवा सुरु गरिएको उहाँको भनाई छ ।  

उद्‌घाटन कार्यक्रममा समन्वय प्रमुख निरौलाले बिरुवा रोपेर मात्रै नहुने त्यसलाई मलजल समेत गर्नुपनि महत्वपूर्ण रहेको उदाहरण पेश गर्दै यसको सेवा विस्तार र प्रभावकारी सेवा प्रवाहमा पनि उत्तिकै ध्यान दिनुपर्ने उल्लेख गर्नुभएको छ । उहाँले जिल्ला अस्पताललाई अभिभावकत्व प्रदान गर्ने, सेवा प्रवाहलाई चुस्त दुरुस्त बनाउने कुरामा आफू र जिल्ला समन्वय समिति दृढ रहेको उल्लेख गर्नुभएको छ ।  

यस्तै कार्यक्रमका विशेष अतिथि तथा फाप्लुका वडा अध्यक्ष युवास तामाङले लामो समयदेखिको योजना आज आएर पुरा भएको भन्दै खुसी व्यक्त गर्नुभयो ।  उहाँले बिरामीले दाँतको सामान्य उपचारका लागी पनि काठमाण्डौ लगायतका अन्य ठाउँहरूमा खर्च गरेर जानुपर्ने बाध्यताको अन्त्य हुनु आफैमा राम्रो पक्ष रहेको बताउनुभयो ।  

कार्यक्रममा बोल्ने क्रममा जिल्ला अस्पताल फाप्लुका दन्त चिकित्सक अनिल सार्कीले आफ्नो अनुभवलाई जिल्लाका विरामको लागी सदुपयोग गर्ने भन्दै दन्त सम्बन्धी जस्तोसुकै समस्याहरूको उपचारलाई सम्भव गराउन आफ्नो प्रयास रहने बताउनुभएको छ ।  दन्त सेवा उद्‌घाटन कार्यक्रममा अस्पतालका सूचना अधिकारी सानी शेर्पा  लगायत अस्पतालका मेडिकल अधिकृत लगायत कर्मचारीहरूको उपस्थिति रहेको थियो ।