स्थानिय सरकारको तदारुकता, पंचन आगलागी पीडितलाई नगद सहित राहत

सोलुखुम्बु, २० वैशाख ।
थुलुङ दुधकोशी गाउँपालिकाले वडा नम्बर ३ पन्चनका आगलागी पीडितलाई आर्थीक सहित अन्य आवश्यक सामाग्री राहत दिने निर्णय गरेको छ । बिहिबार गाउँपालिका अध्यक्ष असिम राईको अध्यक्षतामा बसेको भर्चुवल कार्यपालिका बैठकले आर्थिक सहित अन्य सामाग्री दिने निर्णय गरेको हो ।
जंगलमा लागेको आगो बुधबार गाउँ पस्दा वडा नम्बर ३ को १० घर जलेर पुर्णरुपमा नष्ट भएका थिए । मानिस बस्दै आएको तीनवटा घर र मानिस नबस्ने सात घर जलेर पुर्णरुपमा नष्ट भएका छन् भने गाईगोठ र बाख्राको खोर जेलेको र केही चौपाय समेत जलेर घाइते भएका छन् ।

मानिस बसीरहेको तीनघर परिवारलाई प्रति परिवार रु.५० हजार नगद सहित जस्तापाता, खाद्यान्न, लत्ताकपडा सहितको प्याकेजमा राहत प्रदान गरिने कार्यपालिका बैठकले निर्णय गरेको गाउँपालिका प्रवक्ता भोजराज कार्कीले बताउँनुभयो । उहाँका अनुसार अन्य सात घर परिवारलाई प्रति परिवार रु.२५ हजार नगद राहत प्रदान गरिने छ ।
तीन घर परिवारलाई बासको समेत समस्या भएकाले बिहिबारनै जस्तापाता सहित अन्य आवश्यक सामाग्री हस्तान्तरण गरिने पालिका अध्यक्ष असिम राईले बताउनुभयो । यसका साथै आगलागी पीडितलाई एकद्धार प्रणालीमार्फत राहत प्रदान गर्ने पनि बैठकले निर्णय गरेको छ ।जसको लागी संबन्धित वडाका वडा अध्यक्ष इन्द्रमणी दाहालको संयोजकत्वमा तीन सदस्य राहत वितरण तथा समन्वय समिति गठन गरिएको छ । जसको सदस्यमा वडा नम्बर दुईका वडा अध्यक्ष तथा विपद् व्यवस्थापन समिति संयोगक युजन बस्नेत र वडा नम्बर ७ का वडा अध्यक्ष तथा पालिका प्रवक्ता भोजराज कार्की सदस्य रहने बताइएको छ ।