दक्ष जनशक्ति पलायन हुँदा शिक्षक पाउनै हम्मे हम्मे 

सोलुखुम्बु, बैशाख २१ । हिमाली जिल्ला सोलुखुम्बुमा शिक्षकको अभाव हुन थालेको छ । पछिल्लो समय जिल्लाका सामुदायिक विद्यालयहरुमा पठनपाठनका लागी दक्ष शिक्षकको अभाव हुन थालेको हो । संभावना भएका बौद्धिक युवाहरुको विदेश पलायनले पनि देशमा शैक्षिक जनशक्तिको अभाव हुदै जान थालेको विद्यालयहरु जानउँछन । सोलुखुम्बुको सोलुदूधकुण्ड नगरपालिका वडा नम्बर ८ केरुङको जमुना आधारभुत विद्यालयले १ जना अंग्रेजी शिक्षकको लागी विज्ञापन गर्दा निवेदन नै नआएपछि उक्त विद्यालयमा पदपुर्ति गर्न हम्मे हम्मे परेको विद्यालयका प्रधानाध्यापक भरत श्रेष्ठ बताउनुहुन्छ । जिल्लाका अध्यापन अनुमतिपत्र भएका जनशक्तिले आवेदन नदिएपछि विद्यालय आफैले सम्पर्क गरेर कैलालीका सुवास न्यौपानेलाई नियुक्त गरेको उहाँको भनाई छ ।

जिल्लामा प्रतिस्पर्धी जनशक्ति नहुँदा शिक्षक आवश्यकताका लागी म्याद थप गर्नुपर्ने अवस्था भएको उहाँ बताउनुहुन्छ । यस्तो हुनुमा देशमा घट्दो शैक्षिक गुणस्तरका कारण दक्ष जनशक्ति उत्पादन नहुनु, उत्पादन भएको दक्ष जनशक्ति बैदेशिक रोजगारीको बाटोमा मोडिनु जस्ता कारणहरु रहेको प्रधानाध्यापक श्रेष्ठ बताउनुहुन्छ । यता जिल्ला सदरमुकाममा रहेको जनजाग्रीति माविमा पनि २ शिक्षक पदपूर्तिका लागी पहिलो पटकको विज्ञापनमा एकवटा पनि निवेदन परेनन् । दोश्रो पटक हालसालै खुलाएको विज्ञापनमा समेत खासै चासो कसैले नराखेको प्रधानाध्यापक जनक कुमार थापा बताउनुहुन्छ ।

जनजाग्रीति माविले मावि करार कोटामा १ जना र उच्च मावि दरवन्दी कोटामा १ जना शिक्षक पदपुर्ति गर्न विज्ञापन गरेको भएपनि हाल सम्म १ वटा पनि आवेदन नपरेको उहाँको भनाई छ । देशमा उत्पादित जनशक्तिले देशमा केही गर्ने इच्छा राख्ने क्रम निरन्तर घट्दै जाँदा यस्तो अवस्था सृजना भएको उहाँ बताउनुहुन्छ । यि दुइ विद्यालयमा देखिएको शिक्षक पदपूर्तिको यो अवस्था त उदाहरण मात्र हुन । अझै पनि सोलुखुम्बुमा दरवन्दी अनुसार १ सय ४८ शिक्षक पद रिक्त रहेको शिक्षा विकास तथा समन्वय इकाई सोलुखुम्बुले जनाएको छ ।

जिल्लामा माध्यमिक तहमा २३ जनाको पद रिक्त छ । यस्तै निमावि तहको २१ जना रिक्त छ भने प्रावि तहमा १ सय ४ जनाको पद रिक्त छ । नेपालमा अहिले ४ हजार भन्दा बढी शिक्षकको पद रिक्त छ । २०८० बैशाख देखी चैत्र मसान्त सम्मको अवस्था हेर्दा नेपालमा ४ हजार २ सय २५ शिक्षक पद रिक्त रहेको हो । त्यसमा सबैभन्दा धेरै रिक्त पद प्रावि तहको शिक्षकहरुको छ । प्रावि तहमा ३ हजार १ सय ७९ शिक्षकहरुको पद रिक्त देखिन्छ । यस्तै निमावि तहमा ७ सय ४४ र मावि तहमा ४ सय २ शिक्षकहरुको पद रिक्त रहेको सरकारको तथ्याङक छ । यो तथ्याङ २०८० बैशाख देखी २०८० को चैत्र मसान्त सम्मको हो ।