साकेलाको किवा पुङमा उधौली पर्व धुमधामका साथ मनाइयो

मंसिर १९, सोलुखुम्बु । खोटाङको साकेला गाउँपालिका–३ खिदिमा किराँत समुदायको महत्वपूर्ण सांस्कृतिक पर्व उधौली बिहिबार धुमधामका साथ मनाइएको छ। मंसिर शुक्ल पूर्णिमाको दिन परम्परागत रूपमा पितृको सम्मान र प्रकृतिप्रति कृतज्ञता व्यक्त गर्दै किराँत समुदायले सामूहिक रुपमा उधौली पर्व सम्पन्न गरेका हुन्।

किरातराई संस्कृति संरक्षण परिवारको आयोजनामा, भूपू गाविस अध्यक्ष गणेश कुमार राईको व्यवस्थापन र महेन्द्र कुमार राई, आसिस राई, विवेक राई, सुवास राई र जितेन्द्र राईको सहजीकरणमा कार्यक्रम सञ्चालन गरिएको समितिका सदस्य दिनेश राईले जानकारी दिए। उनका अनुसार यस वर्षको उधौलीमा श्याम बहादुर राई र राम बहादुर राईले सेउली उठाउने परम्परा निर्वाह गरेका थिए ।

किराँत समुदायभित्र याक्खा, सुनुवार, राई र लिम्बूहरू आ–आफ्नो भाषागत पहिचानअनुसार उधौली पर्वलाई क्रमशः चासुवा, फोलस्यादर, उधौली सकेला र चासोक तङ्नामका नामले मनाउने परम्परा रहेको छ। उधौली भनेको खेतीपाती पाकेपछि इष्टदेवता र पितृप्रति कृतज्ञता व्यक्त गर्ने पर्व हो। याक्खा, राई, लिम्बू र सुनुवार समुदाय बिहानैदेखि जातीय पोशाकमा सजिएर च्याब्रुङ्ग बाजाको तालमा धाननाच नाच्दै पूजा स्थलमा पुगेका थिए। पूजापछि सहभागीहरूले परम्परागत चण्डीनाच, च्याब्रुङ्गनाच, ढोलनाच लगायतका सांस्कृतिक नृत्यमार्फत पर्वको उल्लास मनाए ।

वैशाख शुक्ल पूर्णिमामा मनाइने उभौली पर्वमा राम्रो बाली होस् भनी कामना गरिन्छ भने उधौलीमा वर्षभरको सफल खेतीका लागि भूमे (साकेला) देवीप्रति कृतज्ञता व्यक्त गर्ने परम्परा रहेको समुदायको विश्वास छ। गर्मीमा लेकतर्फ उक्लने र जाडोमा तल झर्ने मौसमी स्थलान्तरणसँग पनि उभौली–उधौली पर्व सम्बन्धित मानिन्छ। किवापुङमा मनाइएको यस वर्षको उधौली पर्वले किराँत समुदायको सांस्कृतिक पहिचान र समुहिक एकतामा अझ मजबूती आएको स्थानीयवासीले बताएका छन्।