एसियाली ट्रायल मास्टर च्याम्पियनसिपमा प्रीयाले जितिन स्वर्ण

भदौ ३१, सोलुखुम्बु । खोटाङकी प्रीया राईले एसियाली ट्रायल मास्टर च्याम्पियनसिप फाइनलमा स्वर्ण जित्नुभएको छ । मलेसियाको सबाहमा भएको महिला ७८ किलोमिटर दूरी प्रीयाले १० घण्टा ५९ मिनेट ४८ सेकेन्डमा पूरा गर्नुभयो । सोही स्पर्धामा नेपालकी रशिला तामाङले कांस्य जितिनुभएको छ ।

रशिलाले निर्धारित दूरी तय गर्न १३ घण्टा १५ मिनेट ०९ सेकेन्ड समय खर्चिनु पर्याे । यो स्पर्धामा नेपालका छोकी शेर्पा सातौं, पदमकुमारी सुनुवार आठौं र आङ फुर्वा शेर्पा २२ औं स्थानमा रहनुभयो । ३५ खेलाडी सहभागी थिए । पुरुष ७८ किलोमिटर दूरीमा नेपालका ४ खेलाडीले प्रतिस्पर्धा गरेका थिए ।

४५ धावक सहभागी उक्त स्पर्धामा अर्जुन कुलुङ राईले १० औं, लोकेन्द्र राईले १४ औं, फुर्पासिंह तामाङले २२ औं र मिलन राईले २७ औं स्थानमा दौड टुंगाउनुभयो । राष्ट्रिय खेलकुद परिषद्का कार्यकारी समितिका सदस्य समेत रहेका नेपाल एडभेन्चर रनिङ महासंघका अध्यक्ष एकेन्द्र कुँवरले खेलाडीलाई बधाइ दिदै सफलताले नेपाल साहसिक दौडमा अब्बल छ भन्ने सन्देश प्रवाह भएको धारणा व्यक्त गनुभयो । नेपाली टोली असोज १ गते स्वदेश फर्किने छ ।