स्वास्थ्य कार्यसम्पादन मूल्यांकनमा लिखुपिके गाउँपालिका उत्कृष्ट

असोज २, सोलुखुम्बु । स्वास्थ्य क्षेत्रको कार्य सम्पादनको आधारमा सोलुखुम्बुको लिखुपिके गाउँपालिका प्रथम भएको छ । स्वास्थ्य कार्यालय सोलुखुम्बुले आर्थिक वर्ष २०८०/०८१ मा सम्पादित स्वास्थ्य सम्बन्धी गतिविधिहरूका मुख्य सूचकहरूको आधारमा मूल्यांकन गर्दा लिखुपिके गाउँपालिका प्रथम भएको हो ।

जिल्ला स्वास्थ्य कार्यालय सोलुखुम्बुका प्रमुख सुमन तिवारीका अनुसार द्धितियमा सोताङ गाउँपालिका र तृतिय महाकुलुङ गाउँपालिका भएको हो । प्रथम, द्वितीय र तृतीय हुने स्थानीय तहलाई सम्मान पत्र प्रदान गरिएको छ । कार्यालयले फाप्लु स्थित साङ्ग्रिला होटलमा आयोजना गरेको आर्थिक वर्ष २०८०/०८१ मा सम्पादित स्वास्थ्य कार्यक्रमहरूको जिल्ला स्तरीय वार्षिक समीक्षा तथा योजना गोष्ठीको अवसरमा सम्मान गरिएको छ ।

कार्यक्रममा राष्ट्रिय खोप कार्यक्रम, पोषण कार्यक्रम, बालरोगको एकीृकत व्यवस्थापन कार्यक्रम, परिवार नियोजन कार्यक्रम, मातृ तथा नवजात शिशु स्वास्थ्य सेवा कार्यक्रम, महिला सामुदायिक स्वास्थ्य स्वयंसेविका कार्यक्रम, क्षयरोग नियन्त्रण कार्यक्रम, एड्स तथा यौनरोग नियन्त्रण कार्यक्रम, उपचारात्मक सेवा कार्यक्रम, स्वास्थ्य व्यवस्थापन कार्यक्रम र आपूर्ति व्यवस्थापन कार्यक्रम रहेको थियो । ति कार्यक्रमअन्तर्गत भएका क्रियाकलापको आधारमा अंकभार दिइएको स्वास्थ्य कार्यालयले जनाएको छ ।