सोलुको मुख्य नाका पत्ताले, जोरबौद्ध र आवाडाँडामा यात्रु सहायता कक्ष

असोज १६, सोलुखुम्बु । हिमाली जिल्ला सोलुखुम्बुको ३ स्थानमा यात्रु सहायता कक्ष स्थापना गरिएको छ । चाडपर्वलाई लक्षित गर्दै प्रहरीले सदरमुकाम सल्लेरी स्थित आवाडाँडा, सोलु दुधकुण्ड नगरपालिका–७ को जोरबौद्ध र पत्तालेमा उक्त कक्ष स्थापना गरेको हो ।

चाडपर्वको समयमा व्यवसायीले महङ्गो भाडा लिने, सवारी क्षमता भन्दा बढी यात्रा ओसार्ने लगायतको गैह्रकानुनी कार्य गर्ने भएकाले यात्रु सहायता कक्ष स्थापना गरिएको प्रमुख जिल्ला अधिकारी देवि पाण्डे खत्रिले बताउनुभयो ।

सवारी साधनको निगरानी तथा यात्रुहरुलाई सहजिकरण गर्ने उदेश्यले स्थापना गरिएको सहायता कक्षमा कुनैपनि गुनासा या उजुरी गर्न सक्ने जिल्ला प्रहरी कार्यालय सोलुखुम्बुका प्रहरी प्रमुख एवंम प्रहरी नायव उपरीक्षक द्धारीका प्रसाद घिमिरेले बताउनुभयो । यस अघि पनि चाडपर्वलाई लक्षितगरि स्थापना गरिएको यात्रु सहायता कक्षमा गुनासा आएको र कार्वाही समेत गरिएको डिएसपी घिमिरेको भनाई छ ।

विभिन्न बाहना बनाउँदै यात्रु ठग्ने कार्य भइरहेको गुनासो बढेसंगै केही वर्ष अघि देखि सहायता कक्षनै स्थापना गरि प्रभावकारी निगरानी बढाएको जिल्ला ट्राफिक प्रहरी कार्यालय सोलुखुम्बुका इन्चार्ज कृष्णकुमार कट्वालले बताउनुभयो । पछिल्लो समय देशको सबै जिल्लामा यो अभियान सञ्चालन गर्ने गरिएको छ ।