पहिरोले पुर्ण क्षति पुगेका घरधुरीलाई दिप्रुम चुईचुम्मा गाउँपालिकाले ३५ हजार दिने

असोज १७, सोलुखुम्बु । खोटाङको दिप्रुम चुईचुम्मा गाउँपालिकाले पहिरोले पुर्ण क्षति पुगेका घरधुरीलाई ३५ हजार राहत दिने भएको छ । असोज ११ देखि १२ गतेसम्म गएको बाढी पहिरोले पुर्ण क्षति पुगेका घरहरुलाई पालिकाले प्रति घरधुरी ३५ हजार राहत दिने भएको हो ।

बिहिवार बसेको ४५ औं कार्यपालिका बैठकले आशिंक रुपमा क्षति पुगेको घरपरिवारका लागि १५ हजार रुपैँया दिने निणर्य गरिएको दिप्रुम चुईचुम्मा गाउँपालिकाका अध्यक्ष लोकेन्द्र राईले जानकारी दिनुभयो । उहाँका अनुसार आज बसेको बैठकले विपद व्यवस्थापनका लागि २२ लाख ५० हजार रुपैँया छुटाएको हो ।

पालिकाका भित्र ३१ वटा भन्दा बढी घरहरु पहिरोले पुर्ण रुपमा नष्ट गरेको छ । त्यस्तै बाढीले अन्नबालीमा क्षेति पुगेका पिडितहरुलाई एक मुरी बराबर ३ हजार र बदामको १ मुरी बराबर ८ हजार रुपैँया दिइने भएको छ । बाढीले करिब १ सय मुरी बराबरको क्षेति पुगेको अनुमान गरिएको छ ।

बाढी पहिरोले क्षतविक्षत बनाएको मुख्य सडकहरु पालिकाको पहलमा मंगलबारबाट सुचारु भइसकेको र भित्री सडकहरु  ५ वटा जेसिबिको सहायताले खुलाउने कार्य भइरहेको पालिकाले जनाइएको छ । पहिरोले पञ्चकोशी माध्यमिक विद्यालयका करिब १५० जना विद्यार्थी पढाइबाट बन्चित भएका छन् ।