३ वटा मेसिन लगाएर सडक सखार्दै ऐसेलुखर्क गाउँपालिका 

असोज १७, सोलुखुम्बु  ।  खोटाङको ऐसेलुखर्क गाउँपालिकाले धमाधम सडक सफा गर्न सुरु गरेको छ ।  पछिल्लो मनसुन जन्य विपदले क्षतविक्षत बनाएको गाउँपालिकाका विभिन्न सडक खण्डलाई गाउँपालिकाले एकै पटक ३ वटा मेसिन लगाएर फेरी मर्मत गरिरहेको हो ।  गाउँपालिकाले दशैँ तिहार जस्ता चाड सङ्घारमै रहेकाले पालिका भित्रका विभिन्न वडा जाने सडकलाई धमाधम मर्मतसम्भार गरिरहेको अध्यक्ष गिरेन्द्र बहादुर राईले बताउनुभयो ।

 यस अघि पनि दशै तिहारका लागी भनेर मर्मत गरिएका सडकखण्डमा भारि वर्षातको मार परेकाले ठूला क्षती गाउँपालिकाले भोग्नुपरेपनि फेरी सडक चुस्तदुरुस्त बनाउने प्रयास भइरहेको अध्यक्ष राईको भनाई छ ।  आजबाट गाउँपालिकाले ऐसेलुखर्क महेश्‍वरी हुँदै दिम्लीटार जाने सडक स्तरोन्नतीको काम सुरु गरेको छ ।

उक्त सडक स्तरोन्नतिका लागी काम सुरु भइसकेको र केही दिन भित्र उक्त सडक खण्डमा झरेका पहिरो सफा गरेर सम्पन्न भइसक्ने उहाँकाे भनाई छ । यस्तै गाउँपालिकाको वडा नम्बर ३ र ७ लाई जोड्ने सडकको पनि स्तरोन्नति भइरहेको उहाँको भनाई छ ।  गाउँपालिकामा भएका २ वटा मेसिन र थप १ वटा मेसिन भाडामा लिएर अहिले धमाधाम सडक मर्मत गर्ने कार्य भइरहेको अध्यक्ष राईले बताउनुभयो । गत १२ गते सम्म २ दिन परेको पानीले गाउँपालिकाको सडक सञ्जाल तहसनहस बनाइँदिदा गाउँपालिकालाई ३५ लाख बढीको व्ययभार थपिएको उहाँको भनाई छ ।