मौसममा सुधार भएपछि लुक्ला हवाई उडान सुरु, शनिबार एकै दिन साँढे ६ सय पर्यटक भित्रिए

असोज २६, सोलुखुम्बु । मौसममा सुधार भएपछि तेन्जिङहिलारी विमानस्थल लुक्लामा हवाई उडान सुरु भएको छ  । तीन दिन देखि खराब मौसमका कारण उड्न नसकेका जहाज मौसममा सुधार आएसँगै शनिबार विहान ६ बजेबाट उडान सुरु भएको हो । । आज दशैँको टिकाको दिन ३२ वटा विमानले उडान भरेका छन् ।

तारा एयरको १० वटा, समिट एयरको १३ वटा र सिता एयरको १० वटा उडान भएको लुक्ला विमानस्थल प्रमुख उमेश पन्थिले जानकारी दिनुभयो । त्यस्तै अपरान्ह साँढे ४ सम्म जम्मा ६१ वटा हेलिकप्टरले विदेशी पर्यटक लुक्ला ल्याएको प्रमुख पन्थिले बताउनुभयो । आज मध्यान्ह साँढे १२ बजे देखि भने मौसम प्रतिकुल भएर हेलिकप्टर बाहेकका अन्य जाहाँजहरुले भने उडान गर्न सकेनन् ।

दिउँसो देखिनै मौसम बिग्रिएकाले उडान अनुमति दिन नसकिएको विमानस्थलले जनाएको छ । आज विमान र हेलिकप्टरहरुबाट साँढे ६ सय विदेशी पर्यटक खुम्बु क्षेत्र भित्रिएको जिल्ला प्रहरी कार्यालय सोलुखुम्बुका प्रमुख प्रहरी नायव उपरिक्षक द्वारिकाप्रसाद घिमिरेले बताउनुभयो ।

हिमाल हेर्न र पदयात्राका लागि उपयुक्त मौसम मानिने अटम सिजन अर्थात शरदऋतुको मध्य समयमा औषत दैनिक १ सय ५० वटा उडानहरु हुने गर्दथे । मौसम प्रतिकुल भएकै कारण विगत ३ दिन देखि उडान प्रभावित भएका थिए ।

लुक्लामा रामेछापको मन्थलीबाट ९० प्रतिशत र बाँकी १० प्रतिशत त्रिभुवन विमानस्थल काठमाण्डौबाट सिधै उडान हुने गरेको छ । शनिबार भने १ सय १० जना नेपाली पनि विमान मार्फत खुम्बु क्षेत्रको भ्रमण गर्न लुक्ला पुगेका छन् ।